Williamnagar, January 29, 2023: Meghalaya Janata Dal United (JDU)-ni Convenor aro 43-Williamnagar elakka-ni candidate Robinus T Sangma-ni u•iatani gitade, JDU-ni National General Secretary Afaque Ahmad Khan, January 31 tariko Williamnagar-ona re•bae JDU-ni candidate-rangko parakatanggen.
“JDU-ni sak 21 MP-rang re•bae, Meghalaya a•dokni candidate-rangna chakpaaniko mesokan baksa dakchakaniko on•anggen” ine Robinus T Sangma koborna parakataha. Rongreng Baija Deficit Secondary Skulni gitcham Head Master Robinus T Sangma Williamnagar elakkao chena gita ka•dongsoenga” ineba parakataha.
“Chinga gipin dolni dilgiparang JDU dolo napgiparangni bimingrangko parakatjolgen. Chinga manderangni bimingrangko Social mediarango parakatna nangnikja. Chinga dolni ka•rimskarang baksa name chanchiesa kamrangko ka•enga. Anga Social mediao post ka•e kam ka•ako mesokna sikja. Anga bangbangna ku•mikchetja, anga ku•mikchetatangko chu•sokatesa dontela. Anga Williamnagar a•jao dingtanganiko ra•bana rakbee kamrangko ka•anggen. Gitcham dilgiparangni dilsretanirangko nike anga bilongen ka•a be•a. A•jani manderang dingtanganiko ra•bana namgipa dilgipako seokgen ine anga ka•dongsoenga. A•jani kona noksik gimikchin,JDU dolko manderangni ra•chakaniko nikna gita man•enga” ineba Robinus Sangma parakataha.