Tura, Jan 29, 2023: Assembly eleksin sepangahani gimin dingtang dingtang elakkarango campaign a•bachengate, Robibar attamo Skotong Minister Pa Conrad K.Sangma, South Tura elakkani ning•o ga•akgipa Tura Fancy Valley-ona re•ange gittimni manderangko grongeaha.
Pa Sangma South Tura-ni MLA ong•e, gittimantio dongenggipa dingtang dingtang jatrangna namroro silroroaniko on•aha. Uni gimin ia bilsini eleksino NPP-na chakpae vote-rangko on•pachina sakantikon mol•molangaha.
Uandake Pa Sangma Sonibar attamo Do•bakkol Santinagar-ona re•ange gittimni manderangko gronge, mikkangchi nambata gadango janggi tangani cholko on•na aro bang•bate development-rangko ra•bana ku•rachakenba, NPP-na chakpaaniko on•china manderangko didiangaha.
Ia bilsini eleksino NPP-na cholko on•taie, mikkangchi apsan ku•monge kamrangko ka•angkuna manderangni ka•dongchake dakchakaniko nangnikenga ine aganangaha.
Tura Garo Hills-ni skotong songjinma ong•a, indiba bilsi 45-na maming namroro silroroani aro tang•dodapaniko on•gija galchipaha. Indiba MDA sorkari bilsi 5-ni gisepon sorokrangko namdapataha, songjinmako nitoataha, bang•a dingtang dingtang development-rang aro janggi tangani cholrangko on•aha. Indake mikkangchiba manderangni ka•sae dakchakaniko man•taina ka•dongenga aro apsan ku•monge kamrangko ka•angkuna nangnikenga ineba aganangaha.
Pa Conrad Sangma an•tangni South Tura elakkao Tura-ni MDC aro BJP State Vice President Pa Bernard N.Marak baksa Assembly eleksino bilake susana manderangko ku•mongenga.
Indake ong•engon, Pa Bernard Marak South Tura elakkao Pa Conrad Sangma-ni kosako ka•dongbee dakgrikna tarisoenga ine kobor man•aha.
Pa Marak ma•mongni BJP dilgiparang una chakpae kam ka•ani gimin kusi ong•bee mittelpilskaaniko on•ataha.
Pa Beranrd Marak-ni parakatani gitade, Garo Hills-ni manderang Central Scheme-rangni bang•a namgnirangko man•jaha. Iandakgipa obostarang Garo Hills-o ba Meghalaya a•doko ong•enga, ia ong•sigipa kamrangko bon•atna BJP bilake kamrangko ka•enga. Uni gimin ia bilsini Assembly eleksino BJP Garo Hills-o seat ge 14 ba 15-ko man•telgen aro Garo Hills-o dingtanganiko nikna man•gen ine Pa Marak an•tangni niksamsoaniko parakataha.
Meghalaya a•dokni corruption-ko dakgrikna aro ong•sigipa politics-ko bon•atsrangna, bilake aro rakbate kamrangko ka•angna dingtang dingtang gittimni chadamberang, Robibar attamo Tura City District GS Wilver M.Danggo aro BJYM South Tura Mandal President Moloy Sangma-ni dongram nokona re•ange BJP dolo napetokaha ine koborna u•iataha.
BJP-ni namgipa development aro namgipa kamrangko nike, bang•a Araimile jolni chadamberang Sukrobar attamo Tura MDC aro BJP State Vice President Pa Bernard Marak, Tura City District GS Wilver M.Danggo, BJYM Tura City President aro GS Anish M.Sangma aro Deepan G.Momin-ni dongpanio BJP dolo napeaha ineba kobor man•aha.