Tura, Jan 28, 2023: Assembly eleksin sepangbaengon, dingtang dingtang political dolrang, doltangtangni candidate-rangko cheatna, campaign-rangko a•bachengate, dolsa dolgipin-ni kosako matnanggrikaniko nikna gita man•aha.
Re•anggipa January 24 tariko NPP dolni dilgipa Conrad Sangma, A•dokgre-oni campain-ko a•bachengate, TMC-ni kosako matnangaha. Conrad Sangma-ni matnanga gitade, TMC-ni on•enggipa WE card aro MYE card-ara ‘Bakki Card’, ‘Kela Hobe’-de cholijawa aro TMC maming dakeba a•doko sorkari rikna man•chongmotaja, TMC-de Bengali party-sa ine aganaha.
Uni gisepon, TMC legislature party-ni dilgipa aro warachakenggipa dolni dilgipa Dr Mukul Sangma, Sukrobar salo North Garo Hills a•jani Resubelpara aro Kharkutta-o tom•aniko ong•ate, jinmana aganengon, Conrad Sangma-ni dilenggipa MDA sorkariko ‘Pupet Sorkari’ ba gipin-ni ge•etachi sorkari rikgipa ine aganangskaha.
Indake ong•engon, Tura-ni MDC aro BJP Spokesperson, Bernard N.Marak, Skotong Minister Conrad Sangma baksa South Tura elakkao bilake susaanggen ine aganaha. Ia eleksin-ko India a•songni aro Meghalaya a•dokni manderang nigame aro sengsoe dongenga, maina ia changni eleksin South Tura-o ga•suna sienga ine aganaha.
South Tura-ni manderang maming saloba tangkana re•ja, te•rik mesokana boloni ong•bagipa Amak ong•ja aro Tura-ni manderang ma•sina ja•manchakja. Meghalaya a•dokni Corruption-ko bon•atna, Tura-ni manderang ang baksa bakrimgen aro anga chena ka•donga ine Bernard Marak aganaha.
Ia bilakgipa dolgittam political dolrang, bilake dakgrikna siengon, Congress nokdango so•sojengjeng ong•skaenga. Youth Congress MPCC President Vincent Pala, Working President Deborah C.Marak aro sakgni candidate Bellykid A.Sangma aro Saleng A.Sangma-ni bimangko tarie Sukrobar walo so•e galaha.
Youth Congress, MPCC dilgiparang party-ni ideology-ko ja•rikgija, party-tangni manderangna ticket on•gija, gital napgiparangna ticket on•ani bidingo jegale, January 26 tariko Salmanpara-ni Sinbath Ch.Marak, Selsela-ni Reynold M.Sangma aro Gambegre-ni Saleng A.Sangma-ni ticketko ra•pilchina konta 24 somoiko on•ahachim.
Indiba MPCC dilgiparang Youth Congress-ni dabiako namrenge ra•ani a•sel sakbrini bimangko tarie, Tura Congress Bhavan mikkango so•e galaha.
Unbaksana Tura Congress Office-ko tekchange kam ka•na on•gija champengatgen aro Youth Congress-oni ong•katgrimgen ineba parakataha.