Shillong, September 4, 2022: Meghalaya a•dokni bang•a songrango cha•ugimin truk garirang aro dumper garirangko jajrenga gri salruraenga. Indake batanggimin salrango cha•uangako man•gipa bang•a truk gari aro dumper garirangko man•pilani jamano, Shillong songjinmao bang•a cha•ue ra•bagipa garirangko taridapenga aro Vehicle Identification Number (VIN) baksana Chassis nomborko kimitgale gital nomborko on•enga ine u•iataha.
Cha•uangako man•gipa garini nokgiparangni aganani gitade, Shillong songjinmaan niam gri bading chiwalani ja•pang ong•a ine aganaha.
Silchar songjinmaoniko cha•ue Meghalaya a•dokona ra•napbagipa bolgittam truk garirangko South West Khasi Hills a•jani Nongjri songoniko July jani bon•kamgipa antio man•pilaha. Ia truk garirangko dingtang taridapaha, indiba uamang Chassis nomborrangko kimitgaljani gimin, truk garini asol nokgipana kobor on•atna man•aha.
Indake truk bol gittamko man•pilani ja•mano, gimaenggipa bol 18 truk garini nokgiparang Silchar-oni Shillong songjinma-ona re•bae uamangni gimaenggipa truk garirangko sandie on•china pulisrangko mol•molangaha. Gimaenggipa truk garirangni bidingo uamang Silchar PS-o badi ka•aha ine u•iataha.
Gari nokgiparangni u•iatani gitade, cha•uako man•pilgipa bolgittam truk garirangko Nongthymmai-ni workshop-o MS Body Build unbaksana Sawlad, Demthring aro Laitkor-o donggipa Workshop-o tariataha. Ia obostani bidingo uamang Madanritng PS-ni OC-na August 13 tariko badi ka•e lekka sedongaha.
Truk garini nokgipa baksa Social Activist Agnes Kharshiing aro Amita Sangma sakgni, workshop-rangona re•ange sing•sandianiko dakeaha.
Sing•sandianiko dakahaon, uamang Nongthymmai-o donggipa Workshop-o bang•a truk garirang aro dumper garirangniko taridapaniko nikna gita man•aha. Uanoni bang•batan chassis nombor-rang dongjaha, uarangko kimitna gita uamang grinding machineko jakkalaha. Iasan ong•aigija uamang niamrangko pe•e, truk garirangni carrier-ko ro•dapatenga ine u•iataha.
“Chakka rong dok donggipa truko uamang chakka rong 10-ni bimangko tekna tarienga. Chinga Demthring aro Laitkor-ni workshopchi re•ange nieaha, jeon chinga an•tangni gimaatgimin truk garirangko nikbapilaha, indiba uko an•tangni ine sakkiko on•na gita man•jaha, maina uamang chassis nombor-ko kimite galaha” ine u•iataha.
Mawsynram OC-na lekka sedoaton, “Silchar-ni Bappon Chanda-ni gariko August 2 tariko cha•ue ra•anggipa truk bolsa, TATA Tipper 1618, Registration Nombor AS 11BC-7546 ong•achim, ua gari ua jol chipak ong•engnaba donga. Bang•a chau•e ra•bagipa truk garirang Mawsynram PS-ni ning•o ga•akgipa Majai songni garage-rango donenga” ineba parakataha.
Silchar-ni Activist saksa kobor ra•timgiparang baksa aganprakengon, Nongjri-o man•gipa truk bolsao fake gari nomborko taridapgipa gari nombor ML-07 9068-ko nikaha. Ia truk garini registration nombor, AS-11BC 6238 ong•achim.
“Adita jarangni ja•mano, chingni gimaatgipa truk garirangko chinga man•pilaha. Ian Nonghyllam Pulis Outpost-ni pulisrang aro SP Bashan Laloo-ni dakchakanichi ong•a” ine u•iataha.
Uamangni potchipani gitade, Suraj Gill, Abdul Hassan Bharbhuiya aro Rahim Uddin Bharbhuiya jak donga. Uamang mongsongbate TATA Dipper 1681-ko cha•ue, uko taridape, palenga ineba u•iataha.