Tura, June 26, 2022: North Garo Hills a•jao aiao inmangipa a•sel ong•taiaha. Jean bilsi 19-ni me•tra dambe saksa Tura-oni batanggipa jagnina skang gimaahachim, uni manggisiko June 25 tarik Sonibar salo buring an•chengo gope galako man•pilaha. Ua me•chikko mikbugipa mikchatang me•asa, bilsi sokkugijagipa me•a bi•sa saksani dakchakachi ka•satangko so•ote srik srik chisam buringo gope galaha, indiba ua me•asa an•tangni gope galgipa gopramko pulisna mesoke on•aha.
Sianggipa me•tra dambe Neha Momin-ni nokdangni manderang re•anggipa jagnina skang April 20 tariko Tura, Women Pulis Station-o missing report-ko on•ani ja•mano West Garo Hills, pulis ia mamlani bidingo investigation team-ko bikote sandianiko dakaha.
Pulisrang Neha-ni manggisiko June 25 tariko North Garo Hills a•jani Bajengdoba-ni Didram Chibima sepango donggipa Sona Chiring buring an•chengo gope galako man•pilaha.
“Dos dakgipa mande baksa sakgipin me•a bi•sa saksako chanchichipanio pulis rim•aha aro sianggipa me•chikni manggisiko man•pilaha” ine West Haro Hills a•jani SP Vivekanand Singh Rathore u•iataha.
Pulisrangni sandimittingo ma•siani gitade, sianggipa dambe me•chikni mikchagipa Solesh R.Marak, jean me•chikni gimaanina badi ka•ani gimin jajrengna a•bachengaha, ua me•chik bano maidake gimaaha aro bano ong•enggen uko darangba ma•sijachim.
Neha aro Solesh sakgnian Bajengdoba joloni ong•achim, uamang Tura-o donge poraiengachim.
Dos dakgipa Solesh Marak Tura Govt Kolege-o admission ra•ani ru•utgijan mikchatangko so•otna cholko am•e dongengachim. Pulisrangni sandie ma•siani gitade, uamang sakgnian kusi ong•manchae meligrikgijani a•sel me•chikni janggi rang•gitik gimaona sokaha. Solesh Marak mikchatangko tangka dabina miksonge rim•srukade ong•jachim, indioba ua me•chikni gimachengani ba uko so•otani walonin ua me•chikni mobile changsaba swich on ong•jahachim. Gimik angle gita chanchiaton, mikchatang pantean ka•satang me•chikko so•otaha ine ma•sienba pulisrang Solesh Marak-ko June 22 tariko Bajengdoba-oniko rimbaha.
Sakgipin me•a bi•sa jekon chanchichipanio rim•ahachim, ua bilsi sokkujani gimin uko juvenile-o donna nangaha. Pulisrangni sing•anina Solesh Marak-ni aganchakani gitade, ua Neha Momin baksa mikcha ka•sagrika bilsi 2 ba 3 ong•pilachim, indioba ua sakgipin me•asa baksa mikcha ka•sagrikako ma•siaha.
Indake ua bilsi chu•ongkugijagipa me•a bi•sa saksako dakchakchina baju bakenba uni dakchakachi Neha-ko donuaha.
Solesh Marak mikbuan gape Neha-ko so•otna miksongaha. Indake ua Neha-ko gronge uamang an•tangtangni gualanirangko kema bi•grikna tol•e Bajengdoba-ona okgamataha. Solesh-ni okgamatani gimin Neha an•tangna mai obosta ong•gen maming chanchisoa gri Tura-oni Bajengdoba-ona Solesh-ko grongna re•angaha. Uko so•otani walon Neha Solesh-ko grongeahachim.
Solesh aro me•a bi•sa baksa Neha-ko so•otani ja•mano Neha-ni manggisiko Sona Chiring samba buring an•chengo gope galaha. Pulisrang salanti konta 24, jagnina kingking sandiani ja•mano June 25 tarik Sonibar salo mande gopani maming chin grigipa biapona Solesh Marak pulisrangko rimange mesokaha. Neha Momin-ni soe jronggimin manggisiko Solesh-ni nokoni km 1 mangsan chel•gipa, Sona Chiring sepangoniko man•aha. Neha-ni phone-oniko maming sakkirangko man•jana gita aro swich on ka•o man•jana gita okrurue uni bon•kame Solesh-ko grongani ja•mano galataha. Je biapo Neha-ko so•otahachim, Solesh-ni nokoni miter ritchasa chel•gipa biaponiko Neha-ni phone-ko pulisrang man•pilaha.
Soe jronggimin manggisiko Post Mortem ka•na gita Tura Civil Hospital-ona ra•angaha, indake pulisrang dos dakgipa sakgniko sing•sandianngkue charge sheet baksa Court-ona watatgen ine parakataha.