Baghmara, June 26, 2022: Garo Students’ Union (GSU) Southern Zone, mikka selgipa Baghmara Civil Hospital-ko taridape on•china dabiangtaiaha.
GSU Southern Zone-ni President Chuang Houser Sangma-ni parakatani gitade, batanggimin salrango Baghmara Civil Hospital-ko namdapatchina, changni chang a•dok sorkarina aro medical department-ni bil gnanggiparangna lekka seataha, indiba a•dok sorkari da•onaba Baghmara Civil Hospital-ko taripile on•kuja. Baghmara Civil Hospital ba manderangko sanram biap namsrangjani gimin, sagipa manderangko sanchakenggipa roomrango mikka selani a•sel neng•nikaniko man•enga.
“Chinga Department-ni manderangna maming u•iatsamsoa gri rang•gitik Civil Hospital-ona re•ange sandianiko dakaha. Chinga bang•a changna hospital nokking selani bidingo dilgiparangna u•iate ta•raken tarie on•pachina mol•molaha. Mikka wachini somoio hospital nokking selani a•sel sagipa manderangko biap damsaoni damsaona jitrurana nangenga. Uni gimin Medical Department-o kam ka•giparangna aro saenggipa manderangna neng•nikaniko ong•atenga ineba u•iataha.
Uasan ong•aigija, Department-ni manderang hospitalni paikanarangko rongtale rakkina nanga, maina hospital-ni paikanarangko rongtale rakkijani a•sel Hospital gimiko sengako chakna nangenga. Unbaksana nalarang nosto ong•e, chirang joke galna man•jaenga ine nikna man•aha. Sagipa manderangko donenggipa kuturirango fan-rangba nosto ong•e sagipa manderang sal ding•miting somoio chaktopilgija ding•ako chake dongna nangenga. Ia obostarangko dilgiparang ta•raken nirokatna nanga” ine GSU dabiangaha.