Chokpot aro Kharkutta-ni TMC dilgiparang duko ga•akenggipa manderangko grongea 

Baghmara, June 25, 2022:Batanggimin salrango mikka jimbee waani a•selo bang•a biaprango a•arang be•aha aro chi bannanichi nokrang nosto ong•ako man•aha. Iani a•selo bang•a manderang nok gri jam gri neng•nikaniko chagrongna nangaha.

TMC dilgiparang indake duko ga•akenggipa manderangna aro obostako chagronggipa biaprangona re•ange dakchakanirangko sokatna kamko ka•enga ine u•iataha.

Indake ong•engon, Chokpot elekka-ni MLA Lazarus M.Sangma obosta ong•enggipa biaprangona re•ange nirokaniko dakangaha. Chokpot MLA Sukrobar salo Kakiza chibimako kabatgipa Dagal Gopgre Jangdam Hanging Bridge ona re•ange nieaha.

Lazarus Sangma, Mibonpara aro Durabanda Mangmagwi songrangona re•ange songni manderangko grongeaha. Uandakgipa obostako chagronge duko ga•akenggipa nokdangni manderang baksa agan golpogrike uamangni neng•nikanirangko chel•atna kamko ka•anggen ine ku•rachakbaaha.

Apsandake, Kharkutta elekka-ni MDC Cherak W. Momin-ba obostako chagronge songenggipa nokdangni manderangko aro nok jamko gimaatgipa nokdangni manderangko grongeaha. Indake ua duko ga•akenggipa nokdangni manderang baksa agan golpogrikbaaha. Indake duko ga•akenggipa nokdangni manderangna dakchakaniko on•na ku•rachakbaaha aro pilak nangnikanirangko chu•sokatgen ineba aganbaaha.