Willimanagar, January 16, 2022:Re•anggipa January 13 tariko East Garo Hills a•jani Kera songo Home Minister (HM) Lakmen Rymbui baksa re•bagipa pulis Escort Gypsy gari motor bike bolsako salpake a•sel ong•anio matnangako man•gipa AB-SI Kromith Marak aro driver Dimsrang N Sangma sakgniko kamoniko dondipataha.
Koborna u•iatani gitade re•anggipa January 13 tariko a•sel ong•anio motor bike-ko wrong side ba ong•gija side-ko re•baa ine parakahachim, indiba Escort Pulis Gypsy pilot-an wrong side ong•a ine parakskaaha. Ua a•sel ong•anio pangchake pulis constable sakgniko kam oniko dongdipaha ba (suspend) ka•aha ine East Garo Hills a•jani SP Burno A.Sangma parakataha.
Ua a•sel ong•anio bike salgipa biapon sikamaha aro sakgipin mata buako man•ne hospitalo sanna bananiko dakengachim. Indake ua a•sel ong•aniko namedake sandianiko dakahaon pulis escort gypsy garian wrong side gita re•baha ine ma•sina man•aha aro ua gypsy driver-an dos ong•ahachim.
HM-ko ja•rikbaenggipa pulis gypsy ta•rakprete re•baani a•sel misilbegipa a•sel ong•aha aro rasong gribee motor bike salgipa an•tangni gamchatgipa janggiko gimaataha.
Ia a•selosan pangchakarigija bang•a changon pulis escort-rang aro VIP-rang an•tangtangni bilko jak ko ra•e rama sorokrango agre ta•rakdugae garirangko salani a•sel manderang neng•nikaniko man•ronga aro ua saloba agre ta•rakprete salani a•selsa ong•aha ine nikna man•aha.