Tura, May 28, 2022:Non Gazitted Employees Association (NGEA)-ni gitcham Joint Secretary aro Social Activist Flaming B.Marak aro unbaksa gipin sak 6 GHADC-ni gitcham ka•rimskarang melie GHADC-ni gitcham Executive Committee-ni Secretary Rikse R Marak, GHADC-ni gitcham CEM Diphul Marak aro Benedik Marak, Shyamnagar-ni gitcham MDC Estamur Mominin, GHADC-ni gitcham Principal Secretary Hewingson A. Sangma, Meghalaya a•dokni Health Minister James Sangma-ni nosarigipa Contractor Twinkle Newar Sangma, a•dokni Skotong Minister Conrad Sangma aro gipin sak 6 Contractor-rangni kosako 2021 bilsio Lokayukta Court-o case no. 2-ko segate badi ka•aha.
Koborna parakatani gitade, Flaming Marak aro gipin sak 6 ka•rimskarang GHADC-ni bang•a project-rangko kam ka•jani gimin, scheme-ni tangkarangko jakkalsretanina aro sorkarini ge•etgipa niamrangko ja•rikjani bidingo pangchake badi ka•ahachim.
Uamangni badi ka•anio janapani gitade, GHADC-ni gitcham CEM-rang, MDC-rang aro Contractor-rang GHADC-ko silroro namroroatna ma•mong sorkarini on•atgipa tangkarangko an•tangni namgnisa jakkalaiaha aro bang•a kamrangkon ka•jaha. Iani bidingo sing•sandianiko dakenba Inquiry Officer FD. Sangma jean kamoni neng•takgimin IPS Officer aro Meghalaya Lokayukta Inquiry Wing-ni Director ong•achim, ua report-rangko see on•aha.
Uandake badi ka•aniko Ukil PT. Sangma ia case-ko jako ra•enga ineba u•iataha.
Ia case-ni bidingo Lokayukta Court, ia bilsini May 25 tariko bailable warrant of arrest baksa tangka gong hajar 20-ko GHADC Executive Committee-ni gitcham Secretary Rikse R. Marak, aro respondent nombor 6-gipa jean GHADC-ni gitcham Principal Secretary Hewingson A. Sangma-na on•aha, indiba uamang court-ni hearing-na re•batokjaha.
Indake changgipin hearing-ko Meghalaya Lokayukta Court Act, 2014-ni Section 20 (3)-o pangchake, June jani 29 tarikona ra•doataha ine Flaming Marak parakataha.