GSU-WZ, Dadenggre Sub Division-ko District-ona ra•dojani gimin suk ong•gijaniko parakata
Dadenggre, May 19, 2022: GSU Western Zone (North) Dadenggre, Dadenggre Sub Division-ko songchengaoni maming dingtangdapani aro tang•dodapani gri uan apsan, apsan ong•e dongani gimin suk ong•gijaniko parakataha.
Tengsan M.Marak-ni parakatani gitade, Dadenggre Sub Division-ko 1982 bilsini August 17 tariko Sub Division songaha, indiba da•alona kingkingba maming dingtangani aro namdapani dongkuja.
“Anga Tengsan M Marak GSU-WZ North Dadenggre-ni President da•alo dingtangmancha ia somoio suk ong•ja. Dadenggre-ko 1982 bilsini August jani 17 tariko Sub Division songaha, indiba da•alonaba uan apsan, maming dingtangdapatani gri uan Sub Division ong•e dongkuenga. Chinga bang•a nangnikarangko janape Memorandum-rangko dingtang dingtang Minister-rangna on•aha, indiba darangan maming dakeba nipilani aro namdapatani dongja” ine janapataha.
“Chingni dabianiranga skanggipa Dadenggre Puri Govt. Higher Secondary Skulo Science aro Commerce Stream-ko ra•gatani, gnigipa class chonchongiparangna section-rangko kulie on•ani aro class room-rangko baridapatani, gittamgipa ian chasongni chasongna nangchongmotgipa mingsa ong•a, jekon Dadenggre-o Kolege ge•sako kulie on•china dabiani, brigipa Dadenggre Civil Sub Division-ko pankamgipa (full fledged) District-ona ra•doaniko nangnike, chinga Skotong Minister-ko grongaha. Indiba knachakja. Dadenggre Sub Division-ko District-ona ra•doe on•china 1999 bilsioni chinga mol•molan baksa ka•singipa ku•rangchi dabiahachim, indiba knachakja aro maming ka•dongani kattako sorkari on•a dongkuja” ineba Tengsan Marak janapataha.
Indiba jean ru•utgija aro bang•gija salrangoni dabienggipa, Khasi Hills a•jani Mairang Civil Sub Division-ko Eastern West Khasi Hills, District-ona ra•doataha, Mairang-kode ta•raken District on•aha.
“Uni gimin anga sorkariko sing•na sika mai dakgipa System-o aro maidakgipa ku•monganio Mairang-nade District on•na man•a, maina Dadenggre-kode changni chang dabiengoba maming ka•donaniko on•na man•ja. Maina mancha Dadenggre-ko galchangenga. Chinga da•o changsatai sorkariko gisik ra•attaienga ta•raken Dadenggre Sub Division-ko District-ona ra•dochina aro nanganirangko sulsul kam ka•angpachina” GSU mol•malataiaha.
“Chingni bi•aniko knachakja ong•ode, chinga jrip dongaijawaha aro dingtang ja•kurangko ga•anggen aro chingni dabianiko be•en pilatja dipet ku•monganjko dontongjawa, rak•en kamko ka•anggen. Sorkari pangnan chingni pilak ka•donganiko pe•ronga aro chingni bi•ako galchangbate chingko mikgri ong•ate brangatronga” ine Tengsan Marak janapataha.
Indiba ianpakde, “Chinga chanchimanaha nie dongjawaha rak•gipa aro ka•rongijagipa dingtang ja•kurangko de•anggen” ineba GSU ka•kimchae parakataha.
Uandake Phulbari, Selsella, Rajabala, Tikrikilla aro Raksamgre jolni MLA-rangko didiatna sikenga, maina ia jolrangba Dadenggre Civil Sub Division-ni ning•o ga•aka. Uni gimin hai na•simang apsan ku•monge sorkariko mol•mole didianiko on•pabo aro dabianiko rak•bate apsan kam ka•angpabo, jedakode ta•raken Dadenggre-ko District-ona ra•doataniko man•pagen ine Tengsan Marak didiataha.