Dadenggre, May 18, 2022: West Garo Hills a•jani Dadenggre jolrango bijoli wata tik ong•jaengani gimin, Dadenggre Sub Division-ni MePDCL Officer in-charge-na lekka sedoataha.
Bijoli ching•a tik ong•jani gimin Dadenggre-ni chadambe saksa Salbaram M.Marak-ni janapatani gitade, bijoli wata tik ong•jani a•sel jolni manderang bang•a neng•nikaniko chagrongenga.
Batanggimin adita jarangna bijoli dongjae, andalmindik dongna nangaha. Uandake bijoli dongjani somoio bang•a kenanirang donga, maina cha•ugiparang aro ra•seke ra•giparang manderangni mal gamrangko andalmitting somoio cha•una jotton ka•a aro uamangna andalani somoio namgipa chol ong•a. Uni gimin jolni manderang namen neng•nikaniko man•a.
“Chingni jolo bang•a poraienggipa chatro chatrirang re•baenggipa jarango dingtang dingtang porikkarang jekai CUET, UGC aro gipin NET UGC porikkarangko sena tarisoengon, bijoli ching•a tik ong•janichi neng•nikaniko man•enga ine janapataha.
Indake bijoli wata ba ching•a tik ong•jani gimin porikkana an.tangtangko tarisoanio chatro chatrirang bingbrangatko man•enga.Uni gimin chatro chatrirang aro songni manderangni namgnina ta•rake nirokatenba bijoliko tik ong•e watpachina Dadenggre-ni MePDCL Officer-ko mol•molataha.