Garo aro Khasi ku•sikko 8-gipa Schedule-o ra•gatkujani gimin MLA-rang suk ong•ja

Shillong, March 19, 2022: Meghalaya a•dokni MLA-rang, Eight-Schedule-o Garo, Khasi aro Jaintia ku•sikko segatchina changni chang jotton ka•oba da•ona kingkingba chu•sokatna man•jae duk ong•aniko parakataha.

West Shillong-ni MLA Mohendro Rapsang, A•dokni MLA aro MDC ma•mong sorkario changni chang Garo, Khasi aro Jaintia ku•sikko 8-gipa Schedule-o ra•gatkujani gimin ma•mong sorkari chingni dabianiko aro mol•molaniko maini gimin knachakjaenga ine sing•doangaha.

“An•ching a•dokni Garo, Khasi aro Jaintia ku•sikko Sixth Schedule-o ra•gataha aro ia ku•sikrangan Autonomous District Council-ni Official ku•sikba ong•a. Indide ia ku•sikrangko maini gimin ma•mong sorkari Eight Schedule-o ra•gatjaenga” ineba sing•doangkuaha.
District Council Affairs-ni Minister Lakhmen Rymbui, Garo, Khasi aro Jaintia ku•sikko Sixth Schedule-ode ra•gataha, indiba eight schedule-ode ra•gatkuja ine agantalatangaha.

Siju-Rongara elekkani MLA Rakkam Sangma, “An•ching ku•siktangko ripingna darangkoba sengna nangja, an•ching an•tangtangan ku•siktangko ripingna man•a. An•ching skulni curriculum-rangkoba ku•siktangchi skie ripingna gita man•a” ine agandapangskaha.