GSU, Tura Civil Hospital-ni Superintendent-ko gronge jakkalgijagipa machine-rangni bidingo sing•sandia
Tura, Jan 21, 2023:Garo Students’ Union (GSU) CEC, Tura Sukrobar salo Tura Civil Hospital-ni Superintendent-ko gronge, ru•uta salrangoni jakkalgija donenggipa machine-rangni bidingo sing•sandianiko dakaha.
GSU dilgiparangni u•iata gitade, bang•a biaprangoni saa ding•ako man•ne sanna bananiko dakna re•bagipa manderangni badi ka•aniko man•ne, Tura Civil Hospital-ni Superintendent baksa agan golpogrikaniko dakaha.
GSU dilgiparangni sing•sandianggipa machine-ranga skanggipa Echo-cardiography machine-ko jakkaljani gimin sing•on, ia echo-cardiography machine-ko jakkalna doctor saksako donachim. Jean Civil Hospital-ni gita train ka•e watata ong•ja, indiba an•tang ma•aie kam ka•asan ong•aia, dingtangmancha Civil Hospital-ni gitade, appoint ka•a ong•ja. Uni gisepon ua doctor an•tangni dingtang dingtang kamrang aro sagipa manderangko nina nangani gimin, echo-cadiography machine-ko operate ka•na gita somoi man•ja, uni a•sel sagipa manderang neng•nikaniko man•enga ine Suoerintendent aganchakaha.
Indake ong•engon, ia echo-cardiography machine-ko operate ka•na gita doctor saksako appoint ka•e on•china GSU CEC health department aro a•dok sorkariko mol•molangaha.
Gnigipa CT Scan-ni gimin sing•on, CT Scan bettary nosto ong•ahani gimin tarina watataha, adita salrangni gisepon sokbagen ine aganchakaha. Unbaksana ICU-ba bettary nosto ong•aha, indiba ICU-ni bettary-ko taripilna man•ja, replace ka•na nangaia aro uni dam rakani gimin replace ka•na watatkuja, da•o tangka paisarangko arrange ka•enga ineba aganchakaha.
Minggipinara X-Ray Machine-koba bang•bata manderang aganronga, X-Ray ka•ani ja•mano pangnan doctor-rang rongtalja, ine private X-Ray machine-chi watronga. Una manderang complaint ka•ronga, uni gimin sing•on, dingtang dingtang technician-ni gita neng•nikani donga ine Superintendent aganchakaha.
“Chingni ia civil hospital-ona re•baani miksongade, an•ching nikna man•gen, Garo Hills-o Civil Hospital ge•gittamsan dongaia. Uni gisepon State of Bert-machinery-rangara Tura Civil Hospital-onsan dongaia. Uni gimin dingtang dingtang diatrict-rangoni ia Tura Civil Hospital-onasa re•baronga. Indake Tura-ona re•bae sana banani machine-rangko jakkalna man•jae, private-chi watani a•sel korosrang ong•dapa. Uni giminsa chinga da•alo re•bae niaha aro Superintendent baksa golpoe dingtang dingtang neng•nikanirangko ma•siaha. Iarangko namdapatna Superintendent-ba kam ka•gen aro chingni gitaba apsan kam ka•gen. Maina ia Civil Hospital-ara an•ching gimiknin ong•a, an•ching gimikan name simsakna nanga. Maina ia machinery-rangko an•ching jakkalja ong•ode, indin ong•aigen. Uni gimin chinga mikkangchi iako namdapatna apsan superintendent baksa kam ka•anggen aro dingtang dingtang hospitalo nangdapanirangko ra•bae on•china sorkario dabianggen” ine GSU-CEC-ni President Zikku Balgra N.Marak parakataha.