Shillong, January 21, 2022: Meghalaya a•dokni bilsi 51 gapani salo TMC dilgiparang a•doko silroro namroroanina ja•ku de•e kamko ka•angna ku•mikchetaha.
TMC dilgiparang ia katchabeani salo a•dokni pilak manderangna uamangni nama skaniko on•atan baksa a•dokna kangkare kae kamko ka•angna ku•mikchetaniko dakangaha.
TMC State President Charles Pyngrope, “Meghalaya a•dokni bilsi 51 gapani salo, anga dingtangmancha a•dokni manderangna dolni palo nama skaniko on•chengna ku•si ong•a.Mikkangchi tom•tomaniko rakkiangna aro nama re•mikkanganina ku•cholsan kamko ka•angna” ine ku•mongaha.
“An•chingni pagitcham ma•gitchamrang ia salko man•na gita krengbee kamrangko ka•angaha. Uamangni rakbee kam ka•anichi an•ching da•alo dingtang a•dokko man•ne katchae songdongna man•enga. Meghalaya a•dokko man•na gita an•chingni Matgrikrang an•chi pari nika gri kamko ka•e chu•sokgipa ong•aha. Uamangni an•chi pari nika gri ku•cholsan kamko ka•ani gunko an•ching da•ona kingkingba ja•rikenga. Ku•cholsan nangrime kamko ka•anichi an•chingni a•dokko silroroatna gita man•gen” ine Dr Mukul Sangma aganangskaha.
MLA Miani D Shira, Dikkanchi D Shira aro Jowai-ni TMC Candidate A. Andrew Shullai-ba ia katchaani salo an•tangni nama sikaniko a•dokni manderangna on•ataha.
A•doko tang•doaniko ra•bataina, Ampati elakkani MLA Miani Shira, “An•ching a•dokni manderang meli nangrime ku•cholsan kam ka•ani somoi sokaha. An•chingni dilgiparang sal wal rakbee kamrangko ka•ani biteko man•esa, an•ching da•alo a•doktango katchae rona man•enga. A•dokni Matgrikrang tom•tome ku•cholsan kamko ka•anio bebe ra•a, uni gimin an•ching pilakan uamangni gunko tangkamate rakkina nanga. Chinga TMC-ni dilgiparang a•dokni gunko ra•bapiltaina rake kamrangko ka•anggen” ine aganaha.
Mahendraganj-ni MLA Dikkanchi D Shira, “Da•alo an•chingni a•dokko man•na krengbee kamrangko ka•anggipa an•chingni pagitchamrangko gisik ra•e mittelpilani sal ong•a. Uamangni kang•kae kae ku•cholsan ja•ku de•anichi an•ching dingtang a•dokko man•aha. Uamangni kamrangko gisik ra•engon, an•ching mikkangchi a•dokko tang•doatna on•kange kamko ka•giparang ong•na” ine aganangskaha.
Jowai-ni TMC Candidate A.Andrew Shullai, “Jatni dakbewal rikbewalko ripingna dingtang a•dokko dabie kamko ka•anggipa pagitcham magitchamrangko anga dingtangmancha mittelpilna kusi ong•a. Uamangni niksamsoaniko chu•sokatna, an•ching sakantian kamko ka•na nanga. Uni gimin chinga ku•cholsan melie kamko ka•enba a•dokni namgnina ka•oksie kamrangko ka•anggen” ine aganangaha.