GSU Nongalbibra Regional Unit, NH-ni Minister-na mittelpilani kattako parakata

Baghmara, Oct 31, 2022: South Garo Hills a•jao donggipa Garo Students’ Union (GSU) Nongalbibra Regional Unit, Southern Zone Baghmara, Ma•mong sorkarini dilgipa Road Transport aro National Highway-ni Minister, Nitin Gadkari aro India a•songni Prime Minister Narendra Modi, South Garo Hills a•jani NGO-rangni ku•rang on•ataniko knachake kam ka•atengahani gimin mittelskapilani kattako parakataha.

GSU Nongalbibra Regional Unit-ni President Sewa S.Marak-ni u•iatani gitade, batanggipa 2020 bilsini October 2 tariko Ma•mong sorkarini Road Transport aro National Highway-ni Minister Nitin Gadkari-na, Assam a•dokoni South Garo Hills a•dokona dakbagipa dilsa mongsonggipa ramadilmong chong•motan National Highway (NH)-217 sorok aro jal•langrangko ta•rakale taridape on•pachina mol•mole lekka sedoataniko knachake Nongalbibra-o donggipa Simsang Chibima-ko kabatgipa ge•sa mongsonggipa dollongko chu•gimik matchote taridapahanina kusi ong•aniko parakataha.

Unbaksana, GSU Nongalbibra Regional Unit, NH-217 jean South Garo Hills-o mongsongbatgipa sorok Assam a•dok Dudnhoi-oni South Garo Hills a•jani skotong songjinma Baghmara-ona dakbagipa NH sorokko ta•rakale taridape on•china gitaba Nitin Gadkari-na gisik ra•atpiltaiani lekkako seattaigen ine GSU President parakataha.