GSU-CEC, DC-ko gronge badi ka•enba segimin lekkako on•ang

0

Tura, October 31, 2022: GSU-CEC Headquarter Tura, Sombar salo West Garo Hills a•jani Deputy Commissioner Swapnil Tembe-ko gronge, uamangni dabie segimin lekkako on•angaha.

GSU-CEC-ni sesoanggipa lekkao janapatani gitade, Tura-o donggipa Homeopathy Department jean Tura Maternity aro Child Hospital-o kam manderangko porikka ra•engachim, re•anggipa October 22 tariko sagipa bi•sa saksako porikka ra•ani ja•mano, sal somoi batgimin samko on•ahani bidingo badi ka•e sing•sandianiko dakangchina dabiangaha.

Maternity aro Child Hospital-ni Homeopathy Department-o kam ka•enggipa doctor bi•sa saksako porikka ra•ani ja•mano sal somoi batgimin ba expired ong•gimin samni tarikko aro damko kimitgale gital taridapenba manderangna on•engani gimin GSU CEC raken jegalangaha. Iandake samko tariani sal somoi batgiminko on•aniara mandeni janggina namen kenchakani ong•a aro ra•chakna man•gijagipa doctor-rangni kam ong•a ine GSU-CEC-ni President Zikku Balgra N. Marak janapataha.

“Maternity aro Child Hospital-o sagiparangna aro porikka ra•giparangna nama sanna bannaniko on•na nanga. Indiba Maternity aro Child Hospital-ni Homeopathy department expired ong•gimin samni manufacture tarikko kimitgale on•enga. Uni gimin indakgipa kamrangko GSU raken jegala, mikkangchi indakgipa obostarang ong•taijachina, sal somoi batgimin samko on•anio jak donggipa manderangko ta•rake sandienba kamni kri sastiko on•angna nanga” ine GSU dabiangaha.

Ia obostani bidingo GSU dilgiparang DC-ko gronge chanchirimaniko dakahaon, ia obostani bidingo ta•raken, Medical Supeeintendent aro Medical Officer-rangko gronge sing•sandianiko dakanggen ine DC ku•rachakataha.

Unbaksana GSU-ni dilgiparang sorkari hospital-rangona ba West Garo Hills a•jaona sorkarini watenggipa ba ra•baenggipa samrangko namedake nirok sandianjko daksochina aro samko tariani sal somoirangko check ka•sochina, samko tariani sal somoi batgiminko hospital-rango aro pharmacy-rango palanirangko dontongatchina aro manderangni janggiko naljokatchina GSU dabiangaha. Jedakode manderangni an•seng baljokanina aro saenggipa manderangko namatna, sal somoi batgijagipa aro namgipa samrangko sorkari hospital-rangko on•china GSU mol•molangaha.

Una agreba GSU CEC, chel•a songrangoni Tura-ona re•bae skulo poraienggipa chatro chatrirang re•a doanio namen neng•nikaniko man•engani gimin, Tura-oni Dalu-ona attam 5 bajio ge•sa bus gariko Dalu-ona watchina DC-ko mol•molangaha. Maina Tura-oni Dalu-ona re•ruraenggipa bus gari salni 3 bajion bon•kamgipa re•ani ong•enga, uni gimin, poraienggipa bi•sarang gari dongjae re•a doanio namen neng•nikaniko man•enga aro skul joke noktangona ja•achi re•angna nangani gimin, attamni 5 ba 6 bajimangosa nokona sokangenga. Uni gimin chatro chatrirangni neng•nikaniko niroke Tura-oni Dalu-ona attamni 5 bajio ge•sa bus gariko watpachina gitaba GSU, DC-ko mol•molangaha.

Leave A Reply

Your email address will not be published.