Tura, October 29, 2022: Meghalaya Trinamool Congress (TMC) aro Warachakenggipa dolni dilgipa Dr. Mukul Sangma, FKJGP dolni October 28 tariko kragija dakgipa kamara MDA sorkarina ra•biani gita ong•a ine aganangaha.
October jani 29 tariko, Meghalaya TMC, West Garo Hills a•jani ning•o ga•akgipa Gambegre TMC Block Level Committee tom•aniko ong•ate, jinmana aganprakangengon, Dr. Mukul Sangma, “Sukrobar salo ong•a obostara namjabatsranggipa aro ra•chakna man•gijagipa kam ong•a. Re•jomanio bakko ra•gipa bang•a chadamberang kam man•gija dongengani a•sel ka•dongani gri ong•e, niamkon jaktango ra•e darangnaba kengija gisikni sikako dakaha” ine aganangaha.
Una agreba, Meghalaya a•doko ong•anggimin obostani bidingo Dengnakpara-ni MDC Ma Sadhiarani Sangma, “MDA sorkari a•dokna maming tom•tomaniko ra•bajaha. An•ching salanti bang•a manderangni nangnikanirangko chu•sokate on•china jingjengatanirangko niksona gita man•enga. Batanggimin salo skigiparangni re•jommiting somoio pulisrang Tear Gas-ko godape bang•a skigiparang aro uamangni dedrang saknaako man•tokaha. Uni gimin, an•ching Meghalaya a•doko dingtanganiko ra•bana pilakan apsan ku•monge TMC-ko bilakatna kamko ka•angna” ine ku•monganiko on•angaha.
Ia tom•anio TMC-ni dilgipa aro gitcham Skotong Minister Dr. Mukul Sangma, Mahendraganj-ni MLA Ma Dikkanchi D Shira, Rangsakona-ni MLA Pa Zenith Sangma, MDC Ma Sadhiarani Sangma, Chokpot-ni MLA Pa Lazarus Sangma, Balachanda-ni MDC Te Agassi Marak aro Salmanpara-ni MLA Pa Winnerson D Sangma dongpae bakko ra•angaha.