GSU, Mon-Rongsnagre Govt LP Skul nokko rikgija galchipani bidingo RTI ka•doa

Baghmara, March 10, 2022: GSU, Silkigre Unit-ni President, John Pikilap R.Sangma, Chokpot Civil Sub Division-ni ning•o donggipa Mon-Rongsnagre Govt LP Skul nokko ru•uta bilsirangoni rikgija galchipe donengani gimin, a•sel chong•motko ma•sina gita District School Education Officer (DSEO)-ko Right To Information (RTI) Act, 2005-ni Section 6 (1)-o pangchake Bristibar salo RTI ka•aha ine u•iataha.
GSU President-ni Mon-Rongsnagre Govt LP Skul nokko mai a•selni gimin rikgija galchipe donengachim, a•sel chong•motko ma•sina sike RTI ka•anio sing•ani gitade, Contractor-ni biming aro address, Mon-Rongsnagre Govt LP Skul nokko rikna badita gong tangkarangko on•ahachim, kam ka•china on•gipa lekka ba work order zerox copy, kam matchotatna baita bilsi on•achim, skanggipa tangka okani lekka zerox copy aro bon•kame bill on•gipa lekka zerox copy ba chu•gimik report-ko on•china RTI ka•angaha.