Conrad Sangma bilsi 2022-23-na estimate ka•gimin tangkarangko session-o parakata

Shillong, March 10, 2022: A•dokni Skotong Minister Conrad Sangma Bristibar salni budget session-o bilsi 2022-2023-na chamgimin tangka gong kror 18,700-ko estimate ka•aha, jeoni revenue receipt-ko gong 16,035 kror-na estimate ka•aha aro ma•pang ba capital-oni receipt-ona gong 2,665 kror tangkarangko tariaha ine parakataha.
Srogipa tangkarang gong 2,632 kror-ko changija, chu•gimik estimate ka•gimin receipt-rangara gong 16,068 kror mang ong•achim.
Tangka jakkalanirangko niatgenchimode, sorkari gong 18,881 kror-rangko jakkalaha. Unbaksa tangka ma•pang gong 3505 kror-oniko estimate ka•e tarion, tangka gong 15,376 kror-kode man•dapgen ine estimate ka•aha.
Srogiparangko gampilgipa tangka gong 964 kror-ko changija, jakkalna estimate ka•gimin tangkarangara gong 17,917 kror ong•a.
bilsi 2022-23-na estimate ka•gimin sud (interest)-ni tangkarangara gong 1,110 kror ong•a aro pension-na gamna nangani gong 1,469 kror ong•a.
Budget-ko aganprakengon, Conrad Sangma, ‘anga aro angni sorkari Meghalaya a•dok India a•songni nambatsranggipa dam 10 a•dokrango biming dongatna jotton ka•anggen’ ine aganaha.
Covid-19 sabisini a•selo a•dok tangka paisa (Economy)-ni tang•onnako man•aha, indiba sorkari tangka paisarangko simsake a•dokni namgnina jakkalanichi a•dokni economy tang•dodapaniko nikpiltaina man•engjok ineba ua agandapangaha.
“A•dokni economy-ko nama rama gita niatgenchimode, bilsi 2022-23-na GSDP-ni estimate ka•gimin tangkaranga gong 41,010 kror ong•a. An•chingni estimate ka•gimin ma•pang tangka gong 5,105 kror tangkarangna ma•mong sorkari a•dokna gong 5,851 kror tangkarangko tax gamaha. Unbaksana Special Capital Assistance Program-ni gita, Union Finance Ministry a•dokni Capital Project-rangko jako ra•anina gong 300 kror tangkarangko sanctioned ka•aha. Ma•mong sorkarini a•dokna on•dapatenggipa fund- rangara a•dokna katchaaniko on•a, anga a•dokni pilak manderangni palo Prime Minister aro Union Finance Minister-ko uamangni jaksrambee fund on•atanina mitelpilna ska” ine skotong minister aganaha.
Bilsi 2022-23-o a•dok ma•mong sorkarioniko gong 6,264 kror tangkarangko tax-na estimate ka•soaha. Unbaksana gong 1,033 kror tangkarangko deficit grant, 76 kror tangkarangko disaster management-na, 140 kror-ko Autonomous District Council-na 69 kror-ko urban jolna aro 59 kror-ko Health Sector-na chamatgen.
Schemerangna watatgipa tangka paisarangko changija, ma•mong sorkari a•dokna gong 7,641 kror tangkarangko estimate ka•aha. Ma•mong sorkari Special Capital Assistance-ni tangkarangoniko gong 15,000 kror-oni lak 1 kror-ona tang•doataha jeonikon Meghalaya sorkari 614 kror tangkarangko man•anggen.
Conrad Sangma-ni u•iatani gitade,2022 bilsina a•dokni state tax revenue aro GST-ko man•chape man•a ka•dongsoenggipa tangakaranga gong 2213 kror ong•a.
Batanggimin bilsi 4 somoirango sorkari a•dokni revenue-ko tang•dodapatna raken kamko ka•enga. 2022-23 bilsi angni chu•gimik tax- oniko man•na ka•dongsoenggipa tangaranga gong 2625 kror ong•a jeoni Excise- niko man•na ka•dongsoenggipa revenue gong 350 kror ong•a” ineba parakataha.