Williamnagar, Aug 19, 2022:Garo Students’ Union (GSU) Eastern Zone-ni Vice President Silbil N.Marak, August 19 tarik Sukrobar salo an•tangni ka•sagipa jik-dedrang, ma•drang maharirang aro pilak ripengskarangko wate jringjrotna neng•takram biapona re•angaha.
Uni a•gilsakko wate re•anganichi A•chik jat aro a•songna dal•bea gimaani ong•aha aro chingni ka•tongo aiao inmanpile dukmikchini ong•aha. “Chingni ka•sagimin ka•rimska Silbil N.Marak tangmittingo A•chik a•songna aro jatna gisiko nangbee dangdike on•angaha. Uni A•chik a•songna on•gilanganiko chinga GSMC maming dakeba gualna man•jawa. Uni nokdangni manderangna chinga GSMC duk mikchi ong•chaka aro kalimpaaniko parakatenga. Uni janggi tom•tome neng•takchina aro nokdangni manderangna ka•dimeani ong•bachina chingni sika aro bi•a” ine GSMC, HQ, Tura-ni Assistant General Secretary Cyril A.Sangma duk ong•rimpaaniko parakataha.