Tura, Aug 19, 2022:North Garo Hills a•jani Kharkutta Pulis Station-ni ning•o donggipa Uguri (Garaimari) songni sakgni manderangko Briatibar walo a•a be•dapaha ine kobor man•aha.
Koila a•kolo a•a be•dapa man•gipa sakgni mannderanga bilsi 34 ong•gipa Lependro Sangma aro bilsi 33 Hendid Momin ong•achim, uamang sakgni West Khasi Hills a•jani Shallang Pulis Station-ni ning•o donggipa Goreng (Urak) songo koila cho•engachim, uamang sakgniko rang•gitik koila a•kol ning•o a•a be•dape, Lependro Sangma janggitangko gimaataha, sakgipin Hendid Momin bilongbee saknaako man•aha ine kobor man•soaha.
Indake niam gri a•dokni badiaba biaprango koila cho•anirangko dontongchina a•dokni warachakenggipa dol changni chang a•dok sorkarina mikkrakataniko on•ahachim. Indiba a•dok sorkari manigija sruk sruk koila cho•atani a•sel indakgipa a•selrango ga•ake bang•a manderang janggitangko gimaataha ine warachakenggipa dol a•dok sorkariko matnangataha.
Batanggimin salrango indakgipa a•selrangko a•dok sorkari donnuna jotton ka•oba, manderangni sianiko donnuna man•jaha kakketko parakna nangaha.
Indake duko ga•akenggipa nokdangni manderangna kalimpaaniko parakata baksana saknaako man•enggipa Hendid Momin saknaaoni ta•rake nampilchina warachakenggipa dol nama sikaniko on•ataha.