Tura, May 12, 2022: GSU Chibinang Regional Unit, Phulbari elekkani MLA, SG Estamur Mominin-ni kamna suk ong•gijaniko parakataha.
“Chinga Chibinang jolo donggipa manderang skang chengonin gipin jatrang baksa melie nangrime dongenga. Chibinang jolo gue biterangko ra•na chel•bea biaprangoni bading chiwalgipa manderang re•baronga. Indiba Chibinangni jatchigrikgipa rama mikka wachini somoio namen namsrangja aro gari gora re•na dona gita neng•nikaniko man•a ine janapataha.
Ia rama mikka wachini somoiode mi a•pal gita chacha ong•pila aro bitchil gogenchim, ong•ode November jao biterangko akna man•pilgen. Chingni aganako bebe ra•jaode, MLA an•tangan Chibinang rama jangchiona re•bae mikrontangchi nikna gita man•gen. Wachi kario ia rama rimilani gimin bang•a manderang a•sel ong•ronga. Salantio manderang ia ramani a•sel bang•a neng•nikanirangko chagrongna nangenga, indiba chingni MLA manderangni neng•nikaniko on•tisaba dal•en ra•ja aro re•bae niaba dongja. Manderangni neng•nikanirangko nigrike MLA ia Chibinang ramako manderangni namgnina chanchie tarina nangchongmota” ine GSU Chibinang Regional Unit-ni General Secretary Krengkrong B. Sangma parakataha.