Skotong Minister, skigiparangni dabianiko ra•achakani gimin skigiparang jingjengatanirangko dontonga

Tura, May 12, 2022: Federation of All School Teachers of Meghalaya (FASTOM) ba All Meghalaya Adhoc Skulo skigiparangni dabianiko chu•sokatjaengani gimin Bristibar salo Shillong aro Tura songjinmao jinma re•romaniko dakan baksana Shillong main Sectariate Office mikkang aro Skotong Minister-ni Mini Secretarite Office, Tura-o asonge jingjengataniko dakangaha.

FASTOM dilgiparangni parakatani gitade, re•anggipa 2019 bilsionin bostuni damrang jaanti barikrikengani gimin, skigiparangni dormaharangko bariatchina dabiengachim. Indiba batanggimin bilsi 6-oni da•alona kingking Adhoc Skulo Skigiparangni dormahako bariatkujaengni a•sel bang•a skigiparang bi•sarangko poraiatna aro sana bananiko dakna sakgipinchiko tangka paisarangko sro-ra•chakna nanganichi neng•nikanirangko man•ne janggi tangna nangenga.

Federation-ni hisap ka•e rakkiani gitade, Adhoc skulrango skigiparang LP skulo sak 1116, UP skulo sak 3376, Secondary skulo sak 2164, Science skigiparang sak 388, Hindi skigiparang sak 192 aro higher secondary-o sak 434, chu•gimik Adhoc skulo skigiparang sak 7076 gnangchim.

Ia skigiparangni dormaharangko sakprakna apsan ong•e, jaanti on•china re•anggipa 2019 bilsioni pilak Adhoc Skulrangko Deficit System ba Deficit Patern-ona ra•dochina Federation dabiengachim. Indiba skigiparangni dabianirangko a•dok sorkari chu•sokatjahani gimin Adhoc Skulni skigiparang iani bidingo official tom•aniko ong•ate, neng•nikaniko namatchina mol•molahaoba, da•alona kingkingan a•dok sorkari knachakkuja ine Federation-ni dilgiparang parakataha.

Iani bidingo Education Minister-ni re•anggipa bilsini November jao talatani gitade, a•dok sorkari Adhoc skulo skigiparangko Deficit System aro Deficit Pattern-ona ra•dona maming chanchiani ba miksongani dongkuja ine songbad-rango parakatanina Federation suk ong•gijaniko parakataha.

Skigiparangni minggipin proposal-ara sakprak skigiparangna apsan gong hajal 18,000 dormako on•china aro bilsio 5% mangmang allowance-ko bariatpachina ia bilsini January 18 tariko Meghalaya sorkarini skotong aro Education-ni Secretary-na lekka see on•ahachim. Indiba sorkari iani bidingo kam ka•genma aro ra•chakama ra•chakja iani maming kobor dongkuja ineba parakataha.

Federation, kosako janapgimin pointrango pangchake Adhoc skulo skigiparangni neng•skime janggi tanganiko nike, apsan man•gnirangko on•pachina aro skigiparangni dukko ma•sichake proposal-ko ra•chakpachina sorkariko mol•molahachim. Indiba sorkari skigiparangni mol•molaniko knachakteljani gimin, Meghalaya a•dokni Adhoc skulrango skigiparang May 12 tariko jingjengataniko dakna draatako man•aha.

Indiba May 12 tarikni attam 1 bajimango Skotong Minister Federation-ni dilgiparangko okame chanchirimaniko dakenba, skigiparangni dabianiko cabinet-o chanchigen ine ku•rachakahani gimin, Adhoc skulo skigiparang jingjengataniko dontongatchengaha. Indiba cabinet chanchiani ja•mano skigiparangni dabianiko chu•sokatama chu•sokatja aro cabineto maidakgipa chanchianiko parakgen, skigiparangni ra•chakna man•gipa dabiani ong•genma, ong•jawa ra•chakna man•gijagipa kattarang ong•ode, mikkangchiba jingjengataniko dontongjawa, apsan daken jingjengataniko dakangkugen ine Garo Hills a•jani Federation dilgiparang parakataha.