Shillong, April 19, 2022: Meghalaya SSA School Association (MSSASA) dolni karimskarang da•al salona kingkingba sorkarini ku•mitchetgimin dormaharangko man•kujani gimin ka•a be•e koborna parakataha.
March jao uamang a•dokni Education Minister Lakhmen Rymbui ko grongenba ia obostani bidingo chanchirimaniko dakangaha. Unon Education Minister Lakhmen Rymbui uamangna December aro January jani dormaharangko ma•mong sorkari sokataha aro uamangna taraken dormaharangko sualgnok ine u•iataha.
Union Ministry of Education ni u•iatani gitade, ma•mong sorkari Meghalaya a•dokni SSA skulo skigiparangna 44.64 tangkarangko chamataha. Indide Meghalaya a•dokni sorkari chingna chamatgimin tangkarangko maina da•al salona kingkingba chingona sokatkujaenga ine MSSASA dolni karimskarang sing•doangaha.
Education Department ni Secretary, Ambrose Ch Marak ma•mong sorkarini chamatgipa tangkarangko man•soaha ine parakataha.
Indiba SSA Skul o skigiparang dormaharangko man•kujani a•selo duk mikchi ong•e salantini korosna neng•nike janggi tangna nangenga ineba MSSASA dolni karimskarang aganaha.