Tura, March 30, 2022: NPP dolchi rikenggipa GHADC ni CEM Albiniush R Marak aro Deputy CEM Nikman Marak, Rongrong elekka-ni MDC Rinaldo Koksi Sangma-ni ragatanggipa motion ‘Seperate Elektoral Roll’ ko ra•chakjaha. Seperate Elektoral Roll-ko ra•chakgijanian uamangni A•chik jatna ka•sagijani aro jatko cha•bokani ko mesokaha. Ian A•chik jatni skang chengoni dabibaenggipa rangoni mingsa ong•achim indiba da•al salo an•chingni GHADC ni CEM aro Deputy CEM uko ra•gatna je•chakaha.
“Seperate Elektoral Roll-ko man•genchimode A•chik jatna namen namgni onggnokchim, ian A•chik jatko ripinge rakkiani mingsa chol ong•achim. Elektoral Roll dongjani a•selo gipin rori jat-rangba GHADC ni elektion-o susana gita man•paenga, GHADC ian A•chik jatni noksa ong•a gipin jatni ong•ja. Garo Students Union (GSU) Central Executive Committee ni membor rang, CEM aro Deputy CEM ni rai on•aniko raken jegala uamang A•chik jatna ku•cholsan kam ka•gen ine aganeba jattangko cha•bokaha” ine Zikku Balgra N Marak aganaha.