Tura, March 30, 2022: Garo Hills Autonomous District Council (GHADC) ni budget session-ni gnigipa salo Rongrong elekka-ni MDC Rinaldo Koksi Sangma aro Tura elakka ni MDC Bernard Marak, kror 5 lak 82 Garo Documentary Film ni bidingo janapangaha.
“Re•anggipa Budget Session-oba anga Executive Member Civil Works-o Garo Documentary Film ni Copyright ko man•ahama ine sing•ahachim indiba uamang man•kuja ine aganchakaha. Copyright ko man•a gita an•chingni Copyright Act-ni gita 1957 Section 45 o register ka•na gita man•a indiba Copyright Registration o register ka•chongmotna nanga inede ong•ja. India a•songo video ba film-ko tarigenchimode ©️-ko on•atahaon Copyright ong•aiaha. Indide ia kror 5 lak 82 ni film ara maikai da•ona kingkingba copyright-ko man•kuja? Ia film ko tariani miksonganinba A•chik jatni dakbewal rikbewal aro niam reti rangko ripingan baksana pilakchin gipatna ba Supplying of Information, Education and Communication-ko miksonge tariaha ong•ode, ia film nara maina Copyright ko nanga. Ia film-ko telecast ka•o saoba ia film ko wate tangka man•a jotton ka•osa copyright ko nanga. Indiba Garo Documentary Film-de A•chik jatna tarigipa film sa ong•a, indide ia film ara maina Copyright ko nanga” ine Te Rinaldo Koksi Sangma sing•doangaha.
Rinaldo Koksi Sangma ni sing•anina Wa•gesik Elekka-ni MDC Nathawal Marak aganchakengon, “Garo Documentary Film na Copyright nanga ine aganengon ian A•chik Jatna tarigipa filmsa ong•a aro ia original film-ko saoba chau•e onggija dake tol•dape taridapskaode uan A•chik jatni bidingo ma•sisretaniko ba kra•chaaniko ra•bagen ine chanchisamsoe ia film-na copyright-ko nanga” ine aganchakangaha.
Tura elekka-ni MDC Bernard Marak, ” Anga skango Doordarshan channel na Commercial program rangko tarie on•a. Ge•sa Commercial program-ko tarina gita ma•mong sorkari lak 1 hajar 50 tangkarangkosan sanction ka•aia aro kan•dikgipa video ba program rangko tarina hajar 50 tangkarangkosan on•aia. Garo Documentary Film ian kror 5 lak 82 ni film ong•a ine dilgiparang jinmana aganparakaha. Ia film ni a•bachenggipa second-oan Saidul Khan Production ine seako nikna gita man•gen. Maini gimin Non-tribal jatna ia film-ko tarina kamko on•angskaaha, an•ching A•chik jatrangon indakpile name film ko tarina changgipa manderang gnangchim.Saidul Khan saksa Non-Tribal mandesa, ua maidake ia Documentary Film-ni producer ong•na gita man•aha? Ua GHADC ni gimin aro A•chik jatni gimin maiko skie ra•e,maio pangchakani donge ia film ko tarina gita dilgiparang una bilko on•aha? Ua Documentary Film ko tarina skang A•chik jatni dakbewal rikbewal aro niam reti rangni bidingo name tale skie ra•aha ine maia sakki gnange una ia bilko on•aha? Non-tribal jat rangsa an•ching jatni Documentary Film-ko tarigenchimode ian A•chik jatko chonika gita ong•a. Unbaksana ia film A•chik jatni skanggipa Documentary Film na ong•achim.Ang•ni sing•ani aro ma•sina skanide,maio ka•donge aro pangchake saksa Non-Tribal Saidul Khan na dilgiparang ia film-ko tarina gita kamko on•aha” ine ua Budget Session-o sing•doanganiko dakangaha.
Bernard Marak ni sing•doanganina Nathawal Marak aganchakengon, “Ia Documentary Film-ni bidingo an•ching session-ni matchotani jamano CEM ni chamber asonge golpogrike, ong•a ba ong•jako apsan melie nambatatna jotton ka•angna aro jatna ku•cholsan ong•e kamko ka•angna” ine aganchakangaha.