Tura, October 31, 2022: A•dokni Skotong Minister Pa Conrad Sangma aro Deputy CEM Preston Tynsong, Sohra Civil Sub-Division-ko ta•raken gital a•jako songna rakbee kamrangko ka•enga ine parakataniara bebe ra•na amgijani ong•a.
Indiba a•dok sorkarini ru•uta bilsirangna galchipe donaniko man•enggipa, Dadenggre Sub-Division-ko songe on•na maming chanchiani dongja ine Dadenggre Youth Committee aro District for Dadenggre Committee suk ong•gijaniko parakataha.
“Dadenggre-ko 1982 bilsini August 17 tariko Sub-Division songaha aro apsan bilsion Sohra Sub-Division-ko songaha. Indiba apsan bilsio Sub-Division songako man•gipa songrangoni maina Sohra Sub Division-kosan district ba a•ja songe on•na am•enga ine Dadenggre Demand Committee sing•angaha.
“Chinga Sohra-o donggipa manderangna gital district-ko on•na ama•ani gimin kusi ong•chaka. Indiba sorkarini kamara Dadenggre-ni manderangko kal•ake roani ong•a. Chinga Dadenggre-ni manderang adita bilsirangna changni chang dilgiparangko gronge iani bidingo agangolpogrikaha, indiba darangba, chingni dabianiko knachakkuja. Sohra Sub-Division-ko district songna man•genchimode, Dadenggre Sub-Division-ko maina man•skaja? Dadenggre elakkani MLA ong•a bilsi 10 gapengaha. Uni gisepon, chingni dabianiko aro ku•rang on•aniko darangba knachakkuja. Chinga Dadenggre-ko gital district songe on•china dabiasan ong•ja, indiba Dadenggre-o kolej kulie on•china gita Dadenggre Puri Higher Secondary Skulko tang•doatchina, aro Dadenggre CHC-na Ambulance-ko on•pachina dabienga. MLA-ko seokengon, songna-nokna, jatna a•songna aro manderangna kamrangko ka•e onchinasa seoke watata. Indiba chinga Dadenggre-ni manderang changsaba MLA-ni chusokataniko man•kujaenga” ine Dadenggre-ni District Demand Committee parakataha.