Tura, Feb 18, 2023: Garoland State Movement Committee (GSMC) Tura HQ,-ni dilgiparang, Sukrobar salo Union Home Minister Amith Shah-ko Tura Dobasipara BSF Camp-o gronge Garoland State-na dabie segimin lekkako on•neaha.
Garoland State-na dabie segimin lekkako Union Home Minister-na on•engmitting somoio unbaksa dikdiksa Garoland State-ni bidingo chanchirimengon, GSMC-ni Co-Chairman sakgni Balkarin Ch.Marak, Jakrak A.Sangma aro GSMC-ni Spokesperson Ryan Ch.Marak aro gipin sak 4 dilgiparang dongpaaha.
A•chikrang British-ni India-ko sason ka•mitting somoio 1899 bilsionin, Sonaram R. Sangma sagi jakgitelna dakgrikdila intal da•alona kingking Garoland State-ko on•china dabibaenga. Sonaram Sangma, A•chikrangoni saksa skanggipa Non Co-operative Movement (NCM)-ko ong•ate, India a•songni jakgitelna dakgrikaha. Ua (Sonaram) A•chikrangni a•ako rim•kepe sason ka•ani gimin British sorkari kosako Kolkotta High Court-o badi ka•aha.
Uni ja•mano sakgipin dilgiparang Mody K.Marak aro Emonsing M.Sangma nangrimgimin Garo National Conference (GNC)-ni bimango Garoland State-na dabie, A•chik ku•sikko agangipa Assam-ni A•chikrangna Garo Autonomus Council (GAC)-ko man•chape, British sorkarina Memorandum-ko on•aha, indiba A•chik manderangni neng•skimanirangko ma•sichakjani a•sel chu•sokjaha aro 1946 bilsio Autonomus jolrangko watchanggalaha.
Indake sakgipin GNC-ni dilgipa Cliffort R.Marak sagi Garoland State-na political a•bao donge dakgrikskaha, jean Garoland State-ko dabie, 1992 bilsioni 2014 bilsiona Assembly Session-o ku•rang on•ne dabiangaha.
Unbaksana, A•chik National Volunteer Council (ANVC) bobil dol aro gipin Organisation-rang Garoland State-na 1995 bilsioni 2005 bilsiona dabiaha. Indake GSMC 2012 bilsioni da•o 2023 bilsiona dontonggija Garo Hills gimiko agan-talatan baksa jena kingking dabiani chu•sokkuja, mikkangchiba dabiangkugen ine janapataha.
Indian Constitution-ni Article 29-o pangchake A•chik manderangna Garo Ku•sikko on•na man•a. Unbaksana, a•doktango jakkalgipa A•chik ku•siko on•na nanga, maina Gujarati ku•sikko agangipa manderang Gujarat a•dokko man•aha. Garo ku•sikko agangipa manderang Garoland State-ko man•na nanga.
Unbaksana, chinga namen rasong chaa, Indian Constitution-ni Article 14-o janapani gita, Garorangko apsandake simsakna man•a. Garorang gimikan Indian ong•a, apsandake Bangladesh-oba, indiba chinga chubatgipa gadangni Bureaucracy chu•ongja. Indiba Meghalaya a•dokko man•chengaoni da•o bilsi 51 gapaniko manipilaha, Garorang gimikni gitan komia aro andalaoni teng•suako nikna gita nangkuenga.
Uni gimin, A•chikrangni neng•nike janggi tangenggipa obostarangko niatpachina, Union Home Minister-ko mol•molataha. Ua Garoland State-na dabianiko niatgen ine ka•donganiko on•angaha. Apsandake Assam-ni Skotong Minister Himanta Biswa Sarma, an•ching election matchotani ja•man gronge apsan asonggen aro iani bidingo chanchirimgen ine GSMC dilgiparangna agananganiko koborna u•iataha.
“Chinga ka•donga Ma•mong Sorkari A•chik manderangni neng•skimaniko ma•sichakgen” ine Ryan Marak u•iataha.