AICC-ni dilgiparang GH-ona re•bae Congress candidate-rangna campaign ka•anga

Resubelpara, Feb 19, 2023: All India Congress Committee (AICC)-ni dilgipararang Sonibar salo re•bae, Mendipathar elakkao susaenggipa Congress candidate Timjim K.Momin-na campaign ka•angaha.

AICC-ni General Secretary Mukul Balkrishna Wasnik, jean Maharastra a•dokni Rajya Shabha MP ong•engachim, ua Mendipathar elakkao ga•akgipa, Damas playground-o ong•atanggipa tom•aniona re•bae, Congress candidate-rangna campaign ka•angaha ine MPYC-ni General Secretary aro Media Co-ordinator Junebirth C.Marak u•iataha.

Mukul Wasnik baksa Assam Chaygaon-ni MLA aro Meghalaya-ni Observer Rekkibudin Ahmed, Congress candidate Timjim K.Momin, Dr Tweel K.Marak aro gipin Congress candidate-rangna jakpani noksao sikdepe vote-rangko on•pachina manderangko mol•molangaha.

Ia dal•begipa tom•aniko sokachanio Congress party namen chu•sokgipa ong•aha. Indake ia tom•anio bang•a Damas jolni dilgiparang, songni nokni manderang, Damas Baptist Mondolini dilgiparang aro dingtang dingtang Kristian ma•malrang re•bae Congress dolna chakpaniko on•angtokaha.

Maina Congress party-ara India a•songo namen bilakgipa Political party ong•a. India a•song jakgitelko man•chengaoni Congress party India a•songko sason ka•e India a•songo bang•a namroro silroroanirangko ra•baha ineba parakangaha.

Re•baenggipa February 27 tatiko ong•atna sienggipa Meghalaya Legislative Assembly eleksin-o Congress candidate-rangko cheatna AICC-ni dilgiparang aro Observer-rang re•bae, Garo Hills-ni dingtang dingtang elakka-rango prrogram-rangko ong•ate, campaign-rangko ka•enga ine u•iataha.

Dingtang dingtang Political dolrang, Congress party bilgrijok aro bon•chipjok ine agangenchimoba, Congress party bon•chipkuja aro bilgrija, batesa bilakroroenga. Uni gimin ia eleksino bang•a Congress candidate-rang Garo Hills-o chegen ine Mukul Wasnik ka•dongsoaniko parakangaha.