Williamnagar, 20 Jan: Ja•manchake kobor man•soani gitade, gitcham MLA aro Congress Candidate Ma Deborah C.Marak-ni depanteko gari ta•rakprete salenba scooty bolsao su•gake scooty salgipako siatani gimin, Monggolbar walo Williamnagar pulis rim•aha.
Pulis official report-ni gitade, ia a•sel Williamnagar super market sepangjolo walni 9:30 bajimango ong•aha. Re•baenggipa election-o susaenggipa Congress candidate Deborah C.Marak-ni depante Ruchil C.Marak, gipok hyndai i20 gariko ta•rakprete salangengba scooty salenggipa Sengsrang B.Marak-ni scooty-o su•gakeaha.
A•selo ga•akgipa Sengsrang B.Marak-ko bakan Williamnagar Civil Hoapital-ona ra•angahachim, indiba bilongbee mata buako man•ani a•sel, an•chirang pake siaiaha. Williamnagar Pulis bilsi 28 ong•gipa Ruchil C.Marak aro uni gariko rim•aha ine kobor man•aha.