Tura, Jan 20, 2023: Re•baenggipa election-o Indian National Congress (INC) dolna namen neng•nikbeani ong•enga, maina Rongrong-ni gitcham MDC aro a•dokni gitcham Skotong Miniater Pa Salseng C.Marak-ni depante Congress dilgiparangni kamko namnikjae, Bristibar salo Congress doloni ong•kate NPP dolo napangskaha ine koborna u•iataha.
Silman K Sangma, Salseng Marak-ni dal•batgipa depante ong•an baksa Rongrong elakkani gitacham MDC ong•achim, ua Skotong Minister Conrad Sangma-ni NPP dolo napangaha.
Silman K.Sangma-ko Mendipathar-ni MLA Marthon J.Sangma aro Williamnagar-ni MLA Marcuise N.Marak kusi ong•bee NPP nokdangona rimchaksoaha.
Garo Hills-o mongsonggipa Congress nokdangoni ong•e, February 27 tariko ong•atenggipa Assembly election-o Congress dolko cheatna rakbee kamko ka•engachim.
Indiba Congress-ni dilgiparang mikkang nitee kam ka•ani a•sel Silman Sangma kusi ong•jaha aro pagipani elakka Resubelpara-o susana party ticket-ko bi•engon, una on•na aro Congress dilgiparang an•tangtangni namnikgipa candidate-rangna party ticketko on•skahani gimin Congress dilgiparangni kamko namnikjaha. Uni gisepon Dr Twill Marak, Resubelpara elakkao susana Congress party ticketko am•aha, indiba da•alona kingking party ticket on•kuja ineba janapataha.
Indake ong•engon, da•o ong•enggipa Reaubelpara-ni MLA Timothy D.Shira-na Silman Sangma-ni NPP dolo napanichi namen dakchakani ong•gen, indiba Congress dolna dal•bea gimaani ong•skagok. Silman Sangma-ni Congress dolko wate katanganichi pagipa Salseng Marak-na kratchabeani ong•aha, maina ua re•anggipa 2013 bilsini election-o chegipa ong•e Resubelpara-ni MLA ong•aha aro una skang changni chang MLA chesha.
Unbaksana Congress Working President Deborah C.Marak jean Silman Sangma-ni manitang ong•achim, da•o una jajrengani ong•gnok ineba parakataha.