Gital seoka man•gipa GSU Depa Unit-ni President-na AGP kusi ong•chakaniko parakata
Resubelpara, June 21, 2022:North Garo Hills a•jani dolsa NGO, All Garo People Federation (AGPF) Dainadubi Regional Unit, re•anggipa June 17 tariko eleksin ong•ate seokako man•gipa GSU Depa Regional Unit-ni gital President, Te Salangka N.Marak-na gisik ka•tong gimikchi kusi ong•chakaniko parakatenba, nama sikaniko on•ataha.
“Te Salangka N.Marak ching baksa ong•achim aro chingni Jakrikra ong•e, uni somoio kakket aro bebeo kamrangko ka•achim. Ua ching baksa ong•e kamko ka•angani gimin, chingna namen dukni ong•aha, indiba ua chingni aganako kam ka•gen aro chingaba uni kamko ra•chakgen. Chinga ka•donga, chingni gitcham Jakrikra, GSU Depa Regional Unit-ni Padot ong•e, A•chik Manderangni namgnina kamko ka•anggen, GSU Tangbangchina” ine AGPF-ni President Balcheng K.Sangma, Vice-President Webstar Sangma aro Assistant Secretary Simki Sangma nama sikaniko parakataha.