Shillong, June 21, 2022: Adita salrangna skang Meghalaya A•doko dondikgija mikka waanichi ong•anggipa obostarang, chi banna re•e nosto ong•gipa bang•a rama sorokrang, dollongrang aro a•arang be•ruruanirangko taripilna tangka gong kror 300-ko on•atchina ba dakchakatchina, Skotong Minister Conrad Sangma, Ma•mong Sorkarini Ministry of Home Affairs-ko mol•mole lekka sedoataha.
Skotong Minister Conrad Sangma-ni parakatani gitade, ua an•tangan Sombar salo Ma•mongni Union Home Minister Amit Shah-na a•doko ong•anggipa obostarangko kan•dike agan-talatenba mikka jimbee waanichi a•doko chi banani aro a•arang be•ruruanirangko janapatjolaha.
Mikka waanichi manderangni bang•a nok-jamrang, mal-gamrang, cha•a-ringani bosturang, jilla-kaanirangko gimaataha aro bang•a rama jal•langrango a•arang be•dape nosto ong•a baksa State Highway aro National Highway-ni dollongrangko chi man•pakangaha.
Bang•a a•dokni manderang nok jam gri, ba•ra-chola gri, cha•a-ringa gri janggitangko naljokatna nok-jamko wate katte chaktokaha. Ua manderang da•o buringrango a•tiprangko tarie okkria sitengtoe, dukko chakenga. Ua manderangna a•dok sorkari je cholchiba cha•anirang, samrang, ringani chirang, tarpolin-rangko nokdangantina ta•rake sokatna gita tangka paisa dakchakaniko nangenga ine Conrad Sangma ma•mongni Ministry of Home Affairs-na agan-talate on•ataha.