Shillong, June 21, 2022: A•songni on•gimin Democratic-ni bilo pangchake ong•siangenggipa Meghalaya a•dokko gital ong•atpilna songdongenggipa manderang apsan ku•monge Meghalaya-o gitalgipa sason ka•aniko ra•bapilna miksonge “KAM Meghalaya” ine bimingko donne gital political dolko bikotaha.
‘Kam’-ni miksongara bang•a ku•sikrangon kamde kaman ong•a.
Miksonganiko apsan dondime songdonggipa manderang baksa ku•monge mikkangchina kakket ong•bate kamrangko ka•na aro Meghalaya gimikko man•gope kam ka•angna statement-ko on•atenga ine Forum parakataha.
Sak 90 mang Civil Society-ni membor-rang, Union-rang aro sakanti manderang June 17 tariko apsan Shillong-o tom•e chanchirimaniko dakenba songdongenggipa manderangni vote pu•onna biming segatgiparang baksa cholko sandie ku•cholsan a•song aro jatni namgnina kamrangko ka•angna tik ka•angaha.
KAM-ni miksonganiranga da•o ong•enggipa political dolrang a•dokko dingtangate maming ka•dongani gri ong•ataniko ra•biani aro gamchatgipa Democracy-o ga•chate a•dokna mikpakma nie kakketo kamko ka•anian ong•a. Meghalaya a•dokni saksa niksenggipa aro songsalna kam ka•gipa Ma Angela Rangad, ia ‘KAM’ political dolko bikotdilgipa membor-rangoni saksa ong•a.
“Chinga darangkoba dragija namgijana kam ka•aniko basejawa” “Chinga ku•rachakna man•jawa, ramram aro kakket ong•aniko, indiba chinga man•a dipet jotton ka•e an•tangni dedrangna chakatgen” ine KAM dol parakataha.
Manderangni gimin u•i-ma•sigimin political dolrang baksa apsan chaprime a•dok gimiko kam ka•na jotton ka•gen. Jean environmental-na jegalanirangko dake kakket bichalko ra•bagen aro a•songo kangal cha•asianiko bon•ate kam ka•giparangna namgniko ba rights-ko on•na raken ja•ku de•gen. KAM Meghalaya, Authoritarianism aro Fundamentalism-oniko chel•chakna ba champengna ra•bie kamko ka•enga, uni gimin sakantian kakket ong•e namgipa chanchiani aro miksonganiko apsan ra•chimonge bijangchigipa biapo apsan tom•dake Democratic-ko mikkangchi gital dakpilna miksongani ong•a
Miksonganio apsan ong•e Civil Society-ni ku•rang on•panichi re•baengiipa a•dokni eleksin-rango candidate-rangna vote-rangko pu•onne KAM Meghalaya-ko tang•doatna aro saksa sakgipin-na ma•sirikrikate giproroatna nangenga, jedakode Democratic-o man•gope manderang gimikko dingtangatna ku•rachakenga.
Ku•mongani aro ku•rachakanian politics-ni mongsonggipa kam ong•a aro namgipa bilko jakkale mikkangchi ra•bia gnang a•dokni manderangna dangdike on•na nangchongmotgipa kam ong•a.
A•doko KAM dolko released ka•na chanchiani aro kam ka•na Khasi aro English ku•sikchi minggni lekkarangko see mesokani a•doko bilgrienggipa Democracy aro sorkariko mikkangchi ronggrikate chanchisoa gnang namedake kam ka•na miksongani ong•a. Unbaksana KAM-ni website, www.kammeghalaya.in ko tarie wataha. Lekkarangko download ka•na man•gen aro namedake songdongenggipa manderang baksa ku•rang on•grike KAM-ni bidingo sandie idea-rangko dingtangatnaba man•gen.
Kyrsoibor Pyrtuh-ara ge•sa dolo kimkim ong•e bakko ra•gipa aro KAM-ko ong•atani bidingo apsan ku•monge bimang ong•atanio idea ba cholko on•gipa ong•a ine KAM parakataha.
“Chingoni pangnan bang•a Democracy-ni bidingo agan-ku•pattiparang a•dokko dingtangatna maming miksongani gri aro idea gri re•chakatgenchimode, ramram manderang bebe ra•na amjawa aro an•chingni kosako chakatgen. Indiba uamang an•tangtangoni u•igipa ma•sigipa, kam ka•e nikgipa dongjaode, bil jakchi ra•bie re•chakatna jotton ka•ode maming orto dongjawa” ine KAM talatangaha.
Mikkanggrik namedake Wanpynhun Kharsyntiew baksa chanchirimanio, a•dok gimikni Domestic Workers Movement-ba dongpae, Meghalaya-ni manderangko bakgni dake, terms of class aro ethnicity-ni lekka aro idea baksa apsan tom•dake gamchatgipa agan ku•pattianirangko on•ne mikkangchi nama re•mikkanganio kam ka•angna KAM tik ka•angaha.
KAM ming 15 miksonganirangko parakatenba mikkangchi kamrangko ka•anggen aro a•doko gital Democratic bimangko ra•bapilna ja•ku de•anggen ine parakataha.
KAM-ni ming 15 miksonganiranga
skanggipa niksamsoa gnang sason ka•gipa sorkari aro politics.
Gnigipa, a•songo kangal cha•asiani aro politics-ni namgijagipa kamrangko dakgrike amatani.
Gittamgipa, a•a, environment aro game cha•giparangko chel•chakani.
Brigipa, an•seng baljokaniko on•na miksongani.
Bongagipa, namgipa poraiani gadangko ra•bae on•ani.
Dokgipa, Democratic economy.
Snigipa, chubatgipa ba ma•mong sorkarioni bilko a•doktangni sorkarini jako donna aro tangka paisa on•atako name simsake sorkariko chalaina.
Chetgipa, chadamberangna dakchakani.
Skugipa, Corruption-oni jakgitele kamrangko ka•ani.
Chikunggipa, kam ka•giparangni man•gni ba namgnina an•chakani.
Chi•sagipa, namgipa me•asarangni gun aro me•chikrangni namgnina simsake, me•chikrangko kragija til•ekdraanirangko champengani ba kakket bichalko ra•baani.
Chi•gnigipa, a•doko manderangni tom•tomanina chel•chakani aro naljokatani.
Chi•gittamgipa, toromo olakkigiparangni kosako ong•gija dake kal•akanirang ba fundamentalism-ko warachakani.
Chi•brigipa, Federal aro plural politics-ko gimaatani.
Chi•bongagipa, chanchisretgipa aro jera ra•susagiparangna ka•dongatani.
Bil gnanggipa ong•e kakketo apsan kam ka•e dingtanganiko ra•bana aro gisiko nange bading chiwalgiparangko namdapatna, jean chu•gimik kimkim ong•e kam ka•ani gadangko tang•doatna sakantikon ia dolona okama.
“Chinga salanti hajira kam ka•giparang, game cha•giparang, chatro chatrirang, an•tangtang kam ka•gipa chadamberang, nok rikgiparang, skigiparang, noksa salna changgiparang, dokna dam•na changhiparang, sorkari kamoni neng•takgiparang, gisik seng•giparang aro songsalna kam ka•giparang ong•a, indiba Democracy-ni chong•motgipa bilko saksa sakgipinna gipatna ba on•gilna sika. Chinga KAM-o bebe ra•a, dilgiparangni gitade dingtanganiko ra•bajawa, indiba manderangni jinma apsan ku•monge kam ka•aniosa a•doko dingtanganiko ra•bana man•gen. Uni gimin, jean Democratic-ni gamchataniko nangnika, songdonggipa manderang uamangni salantio janggi tanganiko ma•sina man•gen” ine Angela Rangad aganprakataha.
Uni gimin jemangan KAM-o join ka•na sikenga, KAM-ni gimin ma•sina gita website kammeghalaya.in napange nina ba call ka•na aro ia whatsapp number 9863097754 / 6033005175-ona watatna man•gen ine forum u•iataha.