Baghmara, June 20, 2022: South Garo Hills a•jani Karukol-Balkal bajarko chipe ripe bang•a dokkani mal bosturang jekai, zerox machine, laptop, refrigerator aro dingtang dingtang cha•a ringani mirong, chini, atta, dal, kari aro gipin bosturang chi man•pakange gimaatako man•tokaha.
Re•anggipa June 17 tarikoni da•alona kingking mikka waengkuani gimin chirang dal•barikrike Balkal bajarni dokkanrang gimikkon Simsang Chibima man•pakange, nosto ong•tokaha.
Kobor man•soani gitade, chi bananichi bang•a nok jamrang, bijoli krongrang, mobile network, rama jal•angrang nosto ong•atako man•ne jolni manderang namen neng•nikbeaniko man•tokenga.
Batanggimin adita salrangoni da•alona mikka dondikgija waenganichi a•arang be•dape Meghalaya a•doko adita sak manderang janggirangko gimaataha aro bang•a mal gamrang, nok jamrang, rama jal•langrang, jilla kaanirang, mi-a•palrang, bagan barirang, bijoli krongrang aro mobile network-rang nosto ong•an baksa gimaatako man•aha.
Indake ong•engon, a•dok sorkari duko ga•akenggipa dingtang dingtang a•jani manderangna dakchakaniko on•na gita ja•ku de•enba cha•a-ringani mirong michu, me•su samjak, sam-bolrang, ringani chirang aro tarpolin-rangko a•ja ge•antiona district adminiatration-ni jak gita sokatna jotton ka•enga ine koborko man•soaha.
Mongsongbate Garo Hills-ni dingtang dingtang a•jarango chi banani a•sel bang•a nok jamrangko chi man•pakange nok jam gri, ba•ra chola gri duk chake relief camp- rango dongna nangengachim.