Shillong, April 8, 2022: Meghalaya a•dokni skia poraia matchote kam gri dongenggipa sak 37 chadamberang, kenbegnigipa bobil dolko bikote, re•anggipa April 1 tariko Skotong Minister, Governor aro Pulis Official-rangko May 1 tarikoni boma galdapgen ine ka•mikkenatenba email watataha.
“Chingni skanggipa boma galdapna nisan donenggipa MBOSE building, ge•gipin St. Anthonys’ Skul aro Kolege-o galdapgen. Uni ja•man NEHU-o, jeonikon anga Diploma man•ahachim. Chingni dongipa bomarangoni na•a aro nangni sorkario kam ka•gipa Meghalaya-ni manderang saksaba jokjawa” ine bobil dol chitti see email watataha.
Bobil dolni matnangata gitade, jean bil gnanggiparang uamangna idin tangka gri silchi darerang aro guli barutrangko on•aha, indake uamangni bilakaniko antignini gisepon mesokanggen ineba parakataha.
Uamangni watatgipa email-o Skotong Minister-na “kusi ong•chakaha” ba “congratulated” ine seataha. Skotong Minister, HNLC-ko man•engani gimin “petty” ine mingaha. “Je bobil dolan an•tangtangko bame on•enga, indiba uamangni bame on•a gita chingko apsandake bame on•gen ine chanchinabe” ineba janapataha.
Skotong Minister na•a, “Chingko tracking ka•e, nangni gamchatgipa somoiko gimaatnabe. Skanggipa boma gopretgnioni naljokna nangni dolko ta•rake kam ka•atbo, unon nambatgen. Somoi da•o wilwilengjok. “All the best”, ia email-ko poraie apsankon Governor Satya Pal Malik, Meghalaya High Court-ni Chief Justice Sanjib Banerjee, Labour Minister Sanbor Shullai, Principal Secretary GHP Raju aro gipin sak 6-na copy ka•e lekkako on•atbo ineba janapataha.