Tura, July 14, 2022: West Garo Hills a•jao donggipa Tikrikkila jolni saksa Kingston B Marak, jean re•anggipa 2021 bilsio BJP doloni Rajabala by eleksino chakatahachim, uko Budbar salo pulisrang me•chik saksako rim•sruke ra•anganina rim•aha ine koborna man•aha.
Kobor man•ani gitade, gimaenggipa me•chik bi•sani nokdangni manderang Rajabala Pulis Outposto badi ka•enba uamangni demechik July 11 tarikoni gimaenga ine u•iataha.
Badi ka•e mamlako segatani ja•mano, pulisrang sing•sandianiko a•bachengaha aro Kingston B Marak ua me•chikko rim•sruke Williamnagar songjinmaona rimangaha ine u•ina gita man•aha. Indake ia koborko East Garo Hills a•jani pulisrangna u•iatenba gimaenggipa me•chikko jokatna gita man•aha.
Uandake dos dakgipa mandeko rim•aha, unbaksana gari bolsa aro mobile phone ge•gniko pulisrang ra•sekaha ine u•iataha.
West Garo Hills a•jani pulisrang Shillong songjinmani gimaenggipa me•chik bi•sa sakgnikoba jokataha. Ua me•chik bi•sararangko pulisrang Kherapara songoniko man•pilaha. East Khasi Hills a•jani pulis dolni u•iatani gitade, Amongapara Asugre songoni saksa Rushbell Ch. Momin ia rim•srukanio jak donga ine parakataha.
Apsandake re•anggipa May jaonin me•chik bi•sa saksa gimaengachim, pulisrangni rakbee kam ka•anichi gimaenggipa me•chik bi•sakoba Monggolbar salo Phulbari Gomaijora songoniko nikplaha. Indake ua me•chik bi•sako rim•srukanio jak donggipa sakgni manderangko rim•aha aro uamangoni saksa Somsul Hoque jean rim•srukanio jak dongachim, ua kate jokenga indiba pulisrang uko rim•na rakbee kam ka•enga ine parakataha.