Baghmara, July 14, 2022: GHADC-ni Chairman aro Gasuapara-ni MDC, Sengchim N Sangma Budbar salo Meghalaya Skill Development Society (MSDS)-ni ong•atenggipa jasa sal 30-ni trainingko Chokpot Rajarongat songo donggipa Nokpante Institute of Learning Centre-o oprake on•angaha.
Ia trainingo chadamberangna wa•aoniko rokomanti bosturangko tarina skianggen ine u•iataha.
Training-ko oprake on•engon Sengchim Sangma, “An•ching wa•arangchi rokomanti bosturangko tarie nokrangko nitoatna man•a. An•ching wa•achi mora, pul pot, basket, glass, bottle, container aro uandake rokomanti bosturangko tarina gita man•a.
Uni gimin ia trainingo bakko ra•enggiparang pilak skigiparangni skiako name nirike uko daksninge ra•na man•a. Uasan ong•aigija, Prime Minister Employment Generation Program (PMEGP) scheme-ni gita certificate donge small scale industriy-rangko a•bachengna amgipa manderangna loan-rangko on•enga.
PMEGP-ni Loan-ko man•na gita trainingrangko matchote donna nanga aro an•tangko chu•gipa ong•na kamko ka•na nanga. Chokpot C&RD Block-ni sak 25 trainee-rang ia trainingo bakko ra•enga” ine Sengchim Sangma parakataha.