GHADC-o kam ka•giparang dormaha man•jaengni gimin NGEA ja•ku de•aniko dakna tik ka•a

Tura, Nov 30, 2022:Garo Hills Autonomous District Council (GHADC)-o kam ka•enggiparang dormaha man•jaengani gimin namen neng•nikaniko man•enga ine koborna parakataha.

GHADC-o kam ka•enggipa Non Gazitted Employee Association (NGEA) dolni janapatani gitade, bilsi bon•angan baksa an•tangtangni man•gni dormaharangko man•jaengani a•sel namen neng•nikanirang batroroenga.

Uni gimin, “Chinga changni chang GHADC-ni Secretary aro CEM Albinush R.Marak-ko gronge dormaharangni bidingo agan golpogrikahaon, CEM December jao Krismas-na ja 4 ba 5-ni dormaharangko on•gen ine ku•rachakahachim. Indiba da•alona kingking kobor dongja aro pangnan ku•rachakanirang be•en pil•rongjani gimin, GHADC-o kam ka•giparang kensoenga” ine NGEA-ni President Brithen M.Sangma parakataha.

Indake ong•engon, NGEA chanchianiko dakenba re•baenggipa December 10 tarikoni 15-ona dormahani bidingo maming koborko man•soja ong•ode, December 16 tarikoni maiba ja•ku de•na draataniko man•aignok, ine parakataha.