Chang 6-gipa GHADC-ni Session-o SER Motion-ko ra•chaktaija:Warachakenggipa dol
Tura, Nov 30, 2022: Salgnina ong•atanggipa chang 6-gipa GHADC-ni Session-o warachakenggipa dolni MDC-rang Motion minggittam-ko chanchirimna gita ra•baha, indiba minggittamoni mingsa jekon ru•uta sal somoirangonin manderang dabie sengenggipa, Seperate Electoral Roll (SER)-ko Session-o ra•chaktaijaha ine Warachakenggipa dolni MDC-rang kobor ra•timgiparangna Monggolbar salo aganaha.
Williamnagar MDC Alphonsus R.Marak-ni aganani gitade, jena minge manderangna ka•dongani kattarangko aganne, MDC-rangni dakna nanggni kamko chanchirimna gita motion-ko ra•bachim, indiba NPP-chi dilenggipa GHADC-ni EC, ia changoba SER motion-ko chanchirimna ra•chakjaha. Maini gimin SER-ko Session-o ra•chakjaengachim, maming talataha donguja. Indiba, “Chinga manderangni MDC seokatako man•pae, jeko ku•rang on•na nangengachim, mikkangchiba ka•angkugen” ine aganaha.
Warachakenggipa MDC-rangni agana gitade, Session-o chanchina somoi chu•ongjani gimin somoiko on•dapchina bi•oba somoiko on•dapja. Uni gimin taribagimin sing•anirangko matchote sing•na somoi chu•ongja, NPP led EC kontasana agre somoiko on•rongja ineba aganaha.
Unbaksana, MDC-rangni dongchakenggipa Member Hostel (MH) namjani a•sel, MDC-rang neng•nikaniko man•enga aro mikka selarango dongna nangenga. Una agreba Member Hostel-o table chokkirangba chu•ongja aro Member Hostel mikkangrango sera bera jabolrangko dandake donenga. Uarangko rongtalatna dormaha on•ne mande rakkiachim, indiba nirok simsakja ine janapataha.
Warachakenggipa MDC-rang changni chang MH-ko tarichina complaint ka•ahachim, insiba EM-rang knachakja ineba janapataha.
NPP chalaienggipa EC, Session changatian Tourism-na tangkarangko bang•bate chamenga, indiba kam ka•ade dongja, beben tourism-ko nangja inede ong•ja, indiba nangchongmotgipa kamrangna skanggipa bang•bate tangkarangko chamna nanga. GHADC-o tangka nangbatenggipara kam ka•giparangna dormaha on•na man•gijan ja 27 gaptaijok, uamangna skanggipa dormahako on•chengna nanga ineba warachakenggipa MDC-rang suk ong•gijaniko parakataha.
GHADC-ni development-ko pangnan aganronga, indiba development-de dongja, NPP led EC-ni development-de ramarango waiting shet rikgiparangsan NPP EC-ni development-rangkosan nikna man•aia ineba janapataha.