GHADC-ko kajina gamchina u•iatani ja•mano TMB-ko ra•galchina Bernard Marak dabia

0

Tura, April 7, 2022: Tura Municipal Board (TMB)-ni CEO, Rikse R.Marak GHADC-ko kajina gamchina lekka see u•iatani gimin, TMB-ko ra•gale, GHADC-ni gita namroro silroroaniko ra•bana Town Committee-rangko songe on•skachina Tura-ni MDC Bernard N.Marak dabiangskaha.
Bernard Marak-ni janapatani gitade, TMB-an GHADC-ni ning•osa dongengoba GHADC-oniko kajina gilaniara Sixth Schedule-ni niamko pe•ani ong•a. “Sixth Schedule a•jani ning•o TMB-ko chaliengoba bikpile GHADC-ni kosako kajina gilaniara namen kragijani kam ong•a. Sixth Schedule-ni a•jao maming saloba TMB dongna kraja” ine Bernard Marak janapataha.

TMB, GHADC-ni ning•o dongeba GHADC-oniko kajina gilna maidake man•aha ineba Tura-ni MDC sing•doangaha.TMB Tura songjinmao GHADC-ni bilko aro pilak namroro siroroatani kamrangko ra•seke ganggopenga. Sixth Schedule a•jao TMB maming dakeba tribal manderangoniko kajina gilna bil dongja. Sixth Schedule-ni Article 243-o Municipal-rangko Sixth Schedule a•jao chalaina bilko on•jagenchimoba a•dok sorkari TMB-ko dondrake kam ka•ataniara niamko pe•ani ong•a. Uni gimin TMB, GHADC-oniko kajina gilna bil dongja.”Indakgipa TMB-ni kamko anga raken jegala aro Tura songjinmao Municipality-ko ra•gale Town Committee-ko songe bilakatpiltaina nanga” ine Bernard Marak dabiangaha.Unbaksana Shillong aro Garo Hills-ni Municipal jolrango Town Committee-rangko songna bilko on•china Meghalaya High Court-o dakgrikanggen ineba Bernard Marak parakataha.

Shillong-ode Town Committee-rangko songchina High Court rai on•manaha aro ia apsan raikon Tura-oba on•china High Court-ko didianggen. Tura-o songdongenggipa manderang jaanti TMB aro GHADC-na kajinarangko gamna nangengani gimin neng•nikaniko man•tokenga ineba janapataha.
GHADC-ni a•a Pattarang manderango dongengon, maina TMB-na kajinarangko gamna nangkugen. Trading ba bading chiwalani licence-rangko GHADC-sa on•enga, TMB on•ja. Songjinma jolrango tribal manderangoniko TMB-ni kajina gilaniara niamni a•palo ong•a ine Tura-ni MDC jegalataha.

Leave A Reply

Your email address will not be published.