Niam gri ro•ong bikotenggiparangni kosako NGO-rang badi ka•e DC-na lekka sedoanga
Tura, April 7, 2022: West Garo Hills a•jani ning•o donggipa Selsella jolni nangrimgimin NGO-rang jekai A•chik Students’ Welfare Association (ASWA) aro Federation of Khasi Jaintia Garo People (FKJGP) Selsella Circle Budbar salo niam gri ro•ong bikotenggiparani kosako West Garo Hills a•jani DC-na badi ka•e lekka sedoangaha. Indiba DC dongjani gimin NGO-rang Additional DC-ni jako uamangni badi ka•e segipa lekkako on•baskaha.
FKJGP Selsella Circle-ni President A Ch. Sangma-ni u•iatani gitade, Ramdenggagre songo ru•uta bilsirangoni niam gri ro•ong bikotani a•sel namgipa environment-ko gimaatenga aro ro•ong bikotgipa nokgipani kosako bil gnanggipa department maming ja•ku de•aniko dakja ine u•iataha.
Uni gimin niam gri ro•ong bikotenggipa nokgiparangni kosako ta•rake ja•ku de•aniko dakenba ro•ong bikotaniko dontongatchina aro niam gita sastiko on•china NGO-rang mol•molataha.