Goalpara, April 7, 2022: A•chik Holistic Awakening Movement (AHAM) Assam Zone, Assam a•dokni Skotong Minister Himanta Biswa Sharma-na lekka sedoatenba Lower Beknapara songo Garo Medium Elementary Skulko rike on•china dabiangaha.
“Kotakuti CRC of Dudhnoi Elementary Education Block 36-Dudhnoi LAC (ST)-ni ning•o donggipa Lower Beknapara songo da•ona kingkingba sorkarini rike on•gipa skul dongja. Lower Beknapara songo te 56 nokdangni manderang gnang, indiba songo skul dongjani a•selo uamang km 3 mang chel•gipa songrangona ja•achi re•e skulrangko napna gita nangenga. Uasan ong•aigija Lower Beknapara songo sak 46 bi•sarangko songni Self Help Group-rang aro Mohila Self Help Group-rang an•tangtangko on•kange dormaha gri indin bi•sarangna skie on•enga. Lower Deknapara songo bang•a A•chikrang songdong a•chaenga aro ia song 36 Dudhnoi LAC-ni ning•o ga•aka. Songni bang•a chadamberang songtango skul dongjani a•selo poraianiko dontongna nangao ga•akaha” ine AHAM Assam Zone ni President Raksim Marak parakataha.
Uni gimin chinga AHAM dol Lower Beknapara songo Garo Medium Elementary Skulko kulie on•na nangchongmota ine Skotong Minister Himanta Biswa Sharma aro District Authority-rangko mol•molataha.