Baghmara, Nov 27, 2022: South Garo Hills a•jani Gasuapara Block-ni ning•o donggipa Joint Action Committee (JAC) aro NGO-rang, November 26 tarik Sonibar salo Public aro NGO-rang nangrime chanchirimaniko dakangaha.
Ia tom•anio songni Nokma, Gaonbura, Senior Citizen aro local Export-rang jak on•pae petition-o soi ka•e on•angjolaha ine koborna u•iataha.
Skanggipa jinmani mikkango chanchianiara, a•paloni ba gipin a•dokni manderang, Gasuapara-o donge an•tangtangni licence-o koila badinganiko dontongatchina ja•ku de•ani gimin chanchierimangaha. Indiba NGO-rangnj miksongara gipin jat ba Non-tribal-rangni kosako sinjetaniko on•na miksongani dongja, indiba songtangni ba local tribalrang Meghalaya a•dokni kajinnararangko tang•doatna man•na gita Sixth Scheduled-ni niamo panchake ja•ku de•anirangko dakenga ine parakataha.
A•chikrang a•dok chigani nokgipa ong•genchimoba, nokkol gita da•aloba gipin jatrangni sinjetanirangko man•enga aro an•tangtangni a•jatangon, a•palni dal•dalgipa manderangni ning•o hajira ka•esa janggi tangna nangenga, uni gimin, indake sinjetanirangko champengna gita, Indian Constitution-o dingtangmancha, A•chikrang aro gipin chongipa jatrangna 5 aro 6 Scheduled-ko on•manaha.
Uni gimin Local manderangni bimingrango export ka•genchimode, songni nokni kangal cha•asianiko namatna man•gen aro poraia matchote kam gri dongenggipa chadamberangna namgipa cholrangko on•pana man•gen ine ja•ku de•aniko dakenga ine u•iataha.
“Chinga bang•gija salrangni gisepon Exporter Association-rangna Memorandum-ko on•ne mikangchi indakgipa sinjetanirangko dontongatja ong•ode, Public aro NGO-rang, Nokmarang High Court-o PIL ka•na draattako man•naba donga, indiba NGO-rangni dabianirangko knachakgenchomode, gipin a•dokoni re•bae export ka•anirangko champengjawa ine JAC-ni President parakataha.