Baghmara, Oct 20, 2022: South Garo Hills a•jao donggipa Gasuapara jolni nangrimgimin dingtang dingtang NGO-rang Butbar salo South Garo Hills a•jani DC office-ona re•ange gipin jatrang ba non-tribal-rang an•tangtangni licence-chi direct koila wataniko ba export ka•aniko dontongatchina dabiangaha.
Gasuapara aro uni wilwilao songdongenggipa manderangni neng•nikaniko aro kangal cha•asianiko namdapatna man•na gita tribal ba joltango donggipa manderangni licence-rangchi koilarangko watgenchimode, bang•a joltangni manderang janggi tanganio dakchakaniko man•genchim ine NGO-rang janapataha.
NGO-rangni janapatani gitade, batanggimin bilsi 20 mangna bate Gasuapara Port gita Bangladesh a•songona koilarangko export ka•genchimoba joltangni manderang maming dakchakaniko aro tang•dodapaniko man•jaha.
Gnigipa, poraia matchote kam gri dongenggipa chadamberangna uamangni changa sapani kri koila Company-rango kamrangko on•china dabian baksa mikkangchi chadamberangni namgnina ja•kurangko de•angna manchie DC-na seatgipa chittio janapataha.