Skotong Minister Tura-o rikgipa gital PHE, Sub Divisional Office-ko do•ga oprake on•anga
Tura, Oct 20, 2022: A•dokni Skotong Minister Pa Conrad Sangma Butbar salo New Tura-o rikgipa gital PHE Sub Divisional Office (SDO) nokko do•ga oprake ba nokdonggae on•angaha.
Ia gital office nokko oprake on•angani somoio West Garo Hills a•jani Deputy Commissioner Swapnil Tembe, TMB-ni Chairman Pa JD Sangma, TMB-ni CEO Ma Rikse R.Marak, PHE Zone-II, Tura-ni Additional Chief Engineer Pa S Gajmer, Nogorpara-ni MDC Pa Lineker Sangma, dingtang dingtang department-ni Officer-rang aro bang•a manderang dongpae bakko ra•angaha.
Skotong Minister Pa Conrad Sangma jinmana aganprakengon, covid sabiani a•sel bang•a neng•nikanirangko man•genchimoba, ia office nokko ta•rake matchotatna man•ahani gimin kusi ong•aniko parakangaha.
Pa Sangma-ni agananga gitade, re•anggipa 2019 bilsini November jaon ia office nokko rikna gita work order-ko on•ahachim, indiba covid sabisini a•sel 2021 bilsiosa a•bachengatna nangahaoba ta•raken kamrangko matchotatna man•ahani gimin Pa Sangma kusi ong•e department-ni Officer-rangko mittelangaha.
Meghalaya a•doko JJM-ni kamrangko ka•anio chu•sokgipa ong•engani gimin re•anggipa October 2 tariko Mahatma Gandhi-ni atchiani salko maniani salo India a•songni President, PHE-Department-na dingtangmacha Award-ko on•ataha ine Skotong Minister aganangaha.
Batanggimin salrango Meghalaya a•doko nokdang ge 4000 mangsan chi pipe-rangko man•aiachim, indiba MDA sorkari bilsi 4 ja 6-ni gisepon JJM scheme-ni gita kamrangko a•bachengate on•anichi 35% percent tang•doaha aro nokdang ge lak 2, hajal 50 songadamrango chi pipe-rangko teke on•na man•aha. Ian PHE department-ni rakbee kamrangko ka•anichisa chu•sokgipa ong•aha aro mikkangchiba ia kamrangko ka•angkugen ine Skotong Minister aganangaha.
Ia gital building nokko rikna State Plan-ni ning•o tangka gong kror 1 lak 57 haljal 59-ko 2019 bilsion chamataha, indiba covid sabisiko chagrongani a•sel somoi gita 2019 bilsio kamrangko a•bachengatna man•jaha.
Ringani china neng•nikanirang songadamrangosan ong•aigija Tura songjinmaoba ringani china namen neng•nikanirangko man•engani gimin, chu•onga gita ringani chirangko man•na tangkamgipa chiring chibisikrangko sandie, uarangko namedake ripingenba chirangko sokate on•na man•na gita kamrangko ka•angchina, pipe line-rangko je department-ni ong•genchimoba, apsan ku•monge tom•aniko ong•atenba, rama sorokrango pipe line-rang nosto ong•e, chi jokbrakani a•sel rama sorokrang nosto ong•aha. Uarangko name nirok simsakchina District Administration aro PHE department-ni authority-rangko Pa Sangma didiangaha.