A•song aro jatna janggitangko on•chake sianggipa sipairangko gisik ra•na Run for Martyrs-ko ong•atanga 

Tura, Oct 20, 2022: Meghalaya Pulis, 2nd MLP battalion HQ Goeragre-ni Commandant Burno A.Sangma aro Western Range-ni DIG, Butbar pringo ‘Run for Martyrs’ ba a•songna aro jatna an•tangtangni janggiko on•chake sianggipa sipairangko gisik ra•na gita km 10 marathon race ba katsussaniko ong•atangaha.

Ia katsusaaniko Goeragre 2nd MLP Battalion kal•chakram biaponi a•bachenge Asanang Gate-ona katange Goeragre-ona katangatpile matchotateaha.

Ia marathon race-o bang•a manderang bakko ra•angtokaha. Indake ia km 10-ko katsusaanio Batsrang A.Sangma skanggipa, Withnar A.Sangma gnigipa aro Bethnar A.Sangma gittamgipa ong•e boksisrangko man•angaha. Unbaksana sakgni me•chikrangna consolation boksisko on•angaha.

Ia katsusaanio chegiparangna Goeragre 2nd MLP Battalion-ni Commandant Burno A.Sangma aro Western Range-ni DIG Certificate-rang baksa boksisrangko suale on•angaha.

2nd MLP-ni Commandant Burno Sangma jinmana aganprakengon, ia marathon race-ko ong•atani miksongara 2nd MLP Battalion-ni gita dingtangmancha a•song aro jatna janggitangko on•chake sianggipa sipairangko gisik ra•e, uamangko mande ra•na ia katsusaaniko ong•ataha. Ia katsusaaniko ong•atanio chu•sokgipa ong•ahani gimin bakko ra•gipa sakantiko mittele aganangaha.