Tura, October 18, 2022: Re•baenggipa October 29 tariko Garoland a•dokna dabiani bidingo Garoland State Movement Committee (GSMC) aro National Federation For New States (NFNS) apsan bakrime dal•begipa tom•bimonganiko ong•atanio Garo Hills-ni pilak dilgiparang ra•bae bakko ra•epachina mol•molataha.
NFNS Headquarter Delhi-ni Vice President aro GHADC-ni Deputy Chief Executive Member Nikman Marak-ni u•iatani gitade, GSMC Garo Hills a•jao songdongenggipa manderangni neng•nikani aro nangnikani bidingo tom•e chanchirimaniko dakenga. India a•songni bang•a dingtang dingtang a•dokni manderang ia tom•aniona re•bae bakko ra•anggen. Ia tom•anio darangkoba mikkang nitegija pilakan apsan krimkro kamko ka•angna ja•ku de•anggen. Jinma apsan ku•range, ja•ku ga•e dabigenchimode, an•chingni dabibaenggipa Garoland State-ko bimang ong•atna gita man•gen ine janapataha.
Uni gimin pilak NGO-rang, Ma•gipa Pagiparang, Nokma Sordar-rang, chadamberang aro Garo Hills-ni pilak dilgiparang October 29 tariko Te•teng A•ja kal•chakram biapo ong•atenggipa tom•bimonganiona re•bae bakko ra•epachina Nikman Marak sakantikon mol•molataha.