Health Minister Kherapara CHC-ko rikna pangchakani ro•ongko songe on•anga 

0

Tura, Oct 18, 2022: West Garo Hills a·jani ning•o donggipa Kherapara Primary Health Centre (PHC)-ko Community Health Centre (CHC)-ona ra·dona gita a·dokni Health Minister Pa James K. Sangma Sombar salo pangchakani ro•ongko songe on·angaha.

Ia pangchakani ro•ongko songe on·anio Gambegre-ni MLA Pa Saleng A Sangma, Babelapara-ni MDC Pa Rakesh A. Sangma aro gipin dilgiparang dongpae bakko ra·angaha.

Kherapara CHC-ko rikna gita a·arangko Kherapara-ni Nokma indin on·gilaha.

Ia pangchakani ro•ongko songe on·ani somoio a·dokni Health Minister, jinmana aganprakangengon, ia PHC-ko CHC-ni gadango ra·dona gita kamrangko ka·dilahani gimin Gambegre-ni MLA Saleng Sangma-ko aro songdongenggipa manderangni nangnika gita PHC-ko CHC-ona ra·doe on·na kamrangko ka•ahani gimin a·dokni Skotong Minister Pa Conrad Sangma-ko mittele aganangaha.

Kherapara PHC-o da•o dipet Medical Officer sakgnisan manderangna sanna bananirangko dangdike on·enga ine janapatenba, ia PHC-ko CHC-ona ra·doatahaode ia biapon surgeon, gynaecologist, anaesthesia, ophthalmologist aro uandakgipa doctor-rang baksana nurse aro gipin kam ka·giparang donggnok ine Sangma aganangaha.

A•dok sorkari manderangni namgnina on·enggipa dingtang dingtang an·seng baljokani cholrang, jekai Skotong Minister’s Safe Motherhood Scheme (CMSM), Transit Home for High Risk Pregnant Women aro uandakgipa dingtang dingtang Scheme-rangko ra·china gitaba jolni manderangko didiangaha. Mandena an·seng baljokaniko nangchongmota, mande an·seng baljokgipa ong·jaode, jolrango namroro silroroani sokgenchimoba indinsa ong·gramaigen ine Health Minister aganangaha.

Indake ia tom·anio Gambegre-ni MLA Saleng Sangma jinmana aganprakangengon, Kherapara PHC-ko CHC-ona ra·dochina dabianiko knachakahani gimin a·dokni Skotong Minister Conrad Sangma aro Health Minister James Sangma-ko mittele aganangaha. Kherapara-o PHC donggenchimoba Tura aro Dalu-oni Kherapara-ona chel·grikani gimin bilongbate sagiparangko ra·ruraanio neng·nikanirangko man·na nangenga ineba talatangaha.

Me·chikrang bi•sa an·pakani somoirango sibatengani gimin segiparang an·tangtangni jikgiparangko nambate nirok sandichina songni nokni me·aparangko didiangaha.

Noktangtango sagiparang dongengon, saa bilongbatna skangan uko hospital-rangona ra·angchina gitaba songni manderangko didiangaha.

Leave A Reply

Your email address will not be published.