Tura, October 18, 2022: Garo Hills-ni gitcham UDP aro INC dolni dilgiparang Meghalaya Trinamool Congress (TMC) dolo napea ine koborna parakataha.
Koborna u•iatani gitade, UDP North Tura Block-ni General Secretary Withson Ch. Momin aro gipin sak 35 membor-rang baksa INC-ni mitam kam ka•giparang aro dilgiparang TMC dolo napeaha ine parakataha. Uamang TMC dolna chakpaaniko mesokna West Garo Hills a•jani TMC Office-ona re•bae an•tangtangni bimingko segatangtokaha.
Chokpot ni-MLA Lazarus M Sangma aro TMC Women’s Wing-ni State Mahila President Selma D Shira-ni mikkangona re•bae TMC dolo napeaha. Indake uamangni TMC dolo napeani somoio dongpagipa gipin dilgiparanga gitcham MLA Noverfield R Marak, TMC Wes Garo Hills-ni District Coordinator Safford N Sangma, Tura-ni gitcham MDC Rupert M.Sangma, gitcham MLA aro MDC Candidate Adamkid M.Sangma, North Tura Block-ni President Rollingstone Momin, South Tura Block-ni President Ajay Marak aro gipin Block Level-ni dilgiparang dongpae bakko ra•angaha.
Indake TMC dolona napbagipa gital membor-rangko rimchaksoengon, Chokpot elekka-ni MLA Lazarus Sangma, “Meghalaya a•dokni TMC aro Dr. Mukul Sangma-ni palo anga TMC-ona napbagipa gital membor-rangko rimchaksona ku•si ong•a. South Garo Hills a•jao skigiparangni kamna ge- 108 postrang gnang, jean da•o bangbang ong•e dongenga. Uasan ong•aigija pilak Department-rangon bangbang ong•e dongenggipa post-rang gnang. An•chingna bang•a ku•mitchetanirangko dakaha, indiba uarangko chu•sokatkujaengani gimin. An•ching indita bilsirangna cha•bokaniko man•aha, iarangko dingtangatna aro kakketo sason ka•nagipa sorkariko seokaniba an•chingni jakon ong•a” ine agandapangaha.